香港教育政策混亂不堪，唔單止令家長學生疲於奔命，叫苦連天，而且仲製造社會矛盾，添煩添亂。呢，通識教育咪就係不倫不類嘅怪胎囉。
係人都知，通識科內容空泛、欠缺準則，教師固然無所適從，學生更加怨聲不絕，加上通識科愈來愈政治化，更加備受詬病。正如有行政會議成員話齋，通識科原意係希望訓練學生獨立思考，從多角度了解問題，但係家陣嘅通識教育已經異化為政治議題，以及偏向某些方面嘅資料搜集，與通識教育嘅原意背道而馳。
話時話，通識科政治化早就唔係新聞咯，最經典係年前文憑試通識科練習卷有條題目，竟然係關於當時特首參選人唐英年「車毀人亡」論，你話點答吖？大家都知道，港產官僚出名官官相護，考生為免肥佬，自不然揣摩上意，專揀官老爺啱聽嘅答啦。咁搞法，與其話培養學生獨立思考，不如話培養擦鞋人才好過啦。
咁都未算最離譜，早前有團體被踢爆挾帶私貨，炮製支持佔中嘅通識科教材，向學生宣揚某一政治派別嘅主張，有人批評通識科課程已被「政治教師」騎劫，淪為散播偏激思想嘅平台，真係一啲都冇講錯。
講開又講，香港社會愈來愈政治化，郁吓就抗爭，郁吓就示威，搞到永無寧日，有人年紀輕輕已經成為街頭鬥士，有人未開學就揚言罷課，學生無心向學，一個比一個激，問你怕未。有人慨嘆唔到香港，唔知文革仲未停，計功夫茶話齋，依家嘅學生經過通識科嘅政治訓練，遲早統統變成港產紅衞兵都似！
真係諗極都唔明，今時今日教育問題千頭萬緒，學生兩文三語水平下降、知識層面狹窄、對傳統文化認知不足，對中國歷史一無所知……點解港產官僚有正經嘢唔做，偏偏要無嗰樣整嗰樣，設立所謂通識科來添亂吖？最弊係通識變成通通唔識，學生知識未見增加，反而培養出一批街頭鬥士，簡直係唔衰攞嚟衰。
回歸十七年，亂足十七年，香港已經由經濟城市變為政治城市，躁動不安，烏煙瘴氣，如果下一代都變埋政治動物，香港想唔玩完都幾難。嗱，誤人子弟好大罪，通識科係時候檢討，與其添煩添亂，不如收檔罷喇。