港產官僚講就天下無敵，做就無能為力。好似滅蚊咁吖，當局成日宣傳「小心登革熱，齊來把蚊滅」，實際上滅蚊工作甩甩漏漏，搞到唔少地區蚊患嚴重。嗱，近排登革熱喺廣東等周邊地區大爆發，香港衞生防護中心聲稱會加強滅蚊工作喎，睇吓今次係咪又係得個講字。
登革熱疫情有幾嚴重？廣東最近已錄得超過八千宗個案，造成三人死亡，成為廿年來最嚴重嘅一次，淨係佛山就錄得近八百宗個案；仲有吖，港人熱門旅遊地點之一嘅台灣高雄亦唔好得去邊，錄得超過二千宗個案，問你怕未。正如醫生話齋，登革熱可能導致全身出血甚至死亡，唔係講玩。
登革熱殺到埋身，照計港府應該高度戒備至係，可惜事實啱啱相反。衞生官僚一直滋油淡定，淨係提醒市民清除家居積水，直到尋日衞生防護中心官員至出嚟回應，除咗重彈注意衞生老調，又話政府下星期會召開跨部門會議，商討防控工作喎。
即係咁，遲到總好過冇到，當局防疫雖然慢咗幾拍，但總算肯正視問題，最怕又係姿勢多過實際咋。唔係杞人憂天，今年六月之嘛，天水圍一名女子感染同樣由蚊傳播嘅日本腦炎，當局事後淨係喺天水圍加強滅蚊就當交差，求求其其，唔湯唔水。係人都知，本港好多公園都係蚊患黑點，本報記者早排去各大公園進行「人肉測試」，結果搞到周身傷，甚至試過逗留十五分鐘就被三十隻蚊咬添。所以話啫，衞生官僚踢一踢郁一郁，旨意佢哋防疫，真係信唔過。
滅蚊不力都算嘞，最離譜係當局居然帶頭養蚊。最近連場大雨，揭發原來好多政府地盤藏污納垢，亂象叢生，地洞積水有之，堆滿垃圾有之，五花八門，無奇不有。有人諷刺港府係製造蚊患嘅幕後黑手，真係一啲都冇講錯。
正所謂一污俱污，香港地愈來愈污糟，除咗蚊患，鼠患甚至蝨患乜都齊，都唔知好嬲定好笑。鬼咩，港府次次都係出事後至賊過興兵，過後就關人個關，環境衞生又點可能改善吖。好似當年爆發沙士咁，港府係威係勢，話要清除全城衞生黑點，結果風風火火搞咗幾場清潔騷後，一切又打回原形，唔怪得近年豬流感、禽流感爆完一鑊又一鑊啦。
咪話功夫茶唔提醒，家陣香港七國咁亂，政治爭拗無日無之，正經嘢完全冇人理，好易出事嘅咋。唔該衞生官僚打醒十二分精神，把好防疫關，唔好再搞個大頭佛吖！