「開開心心上班去，平平安安回家來」，相信係所有打工仔嘅共同願望，可惜對於建造業工人嚟講，奪命意外頻生，返工有如賭命，能唔能夠平平安安回家，真係要望天打卦。
呢嗱，話口未完又出事嘞。日前有位工人喺東涌對開港珠澳人工島地盤對開海面躉船工作時，不慎失足墮海，無辜喪命。唔講唔知，今次已經係四個月來第三宗同類工業意外，都咪話唔得人驚。正如工會代表指出，海上工作經常要加班，趕工至深夜係家常便飯，僱主應該提供足夠照明設施，並定期檢查安全設備；工會同時呼籲當局盡快檢討相關法例，特別係強制工人作業時必須穿着救生裝備。
冇錯嘞，確保工業安全，防止發生意外，工人同僱主固然要打醒十二分精神，但當局亦有責任。試諗吓，如果法例清楚寫明安全措施同標準，並且列明違規嘅罰則，加上當局監管到位，又點會發生咁多悲劇吖？
講開又講，近年工業意外數字居高不下，海上工作嘅危險性只係冰山一角咋。勞工處數字顯示，建造業整體工業意外由一一年嘅三千一百宗升至舊年嘅三千二百多宗。以一一年為例，建造業工業意外死亡率係每千名工友有零點四宗，足足比英國高出十七倍。淨係今年首季之嘛，建造業就錄得十宗致命工業意外，連勞工及福利局局長張建宗都承認情況罕見，有人形容建築地盤已經變為龍潭虎穴，真係一啲都冇誇張！
嗱，家陣大型基建陸續動工，建造業人手荒嚴重，即使人工不斷提高，重賞之下亦無勇夫，之唔係因為工作太危險囉。正如有立法會議員話齋，未來仲有多項填海及基建工程上馬，包括機場第三條跑道及石鼓洲焚化爐等，在在需要大量人手，如果冇人肯入行，你話點算呢。
真係諗極都唔明，本港明明有好多負責監管同宣傳工業安全嘅衙門，包括勞工處、機電工程署、職業安全健康局等，而每次出事，官員亦例牌實牙實齒話會加強巡查同執法，咁點解工業意外仲係有增無減呢？鬼咩，港產官僚出名互相扯皮，互相卸責，三個和尚冇水喝，多人管即係冇人管，咁搞法，有乜法子唔死得人多吖。
正所謂，針唔拮到肉唔知痛，想勞工官僚做嘢，話都冇咁易，只要請佢哋親自上陣，深入地盤「探險」咪得囉，係咪！