政府宣傳片有句口號︰「入住持牌賓館，旅遊安全之本。」可惜吖，由於當局執法不嚴，發牌標準寬鬆，無牌賓館開到成行成市，亂象叢生，舊年北角五洲大廈發生無牌賓館奪命火災後，當局終於肯檢討旅館業條例，點知又遭到業界強烈反彈，搞到進退兩難，問你服未！
呢，立法會一個委員會尋日召開公聽會，討論檢討旅館業條例，其中一個重點係以大廈公契規定，作為發牌、續牌或者釘牌嘅依據。有業界代表炮轟當局突然「搬龍門」，唔准賓館喺住宅大廈裏面經營，係不公不義，估計四千間賓館可能結業喎。
即係咁，無牌賓館多數開喺舊樓，環境惡劣，消防隱患唔在講，品流複雜更加對居民造成極大滋擾。正如有居民代表話齋，好多住戶都希望當局發牌時能夠嚴格把關。問題係，港府過往無監無管，放任自流，依家至揸正嚟做，搞到業界無所適從，唔怪得怨聲四起。呢，過去五年當局檢控違規賓館嘅罰款，普遍少過五千元，遠低於廿萬元嘅最高罰則，加上當局發牌求求其其，只要單位符合《建築物條例》同埋《消防條例》，就來者不拒，業界習非成是，咪搞到亂象叢生囉。
咁又難怪嘅，港產官僚向來都係後知後覺，平時唔燒香，臨急抱佛腳，次次都要等到爆大鑊至補救，近日搞到人心惶惶嘅坑渠油風波正正係典型例子。可惜，所謂嘅補鑊只不過係做場大龍鳳，過後又不了了之，今次話就話加強打擊無牌賓館，事實係點，仲要睇過至知。
再講吖，蝕本生意無人做，殺頭生意有人做，咪睇好多無牌賓館殘殘舊舊，其實係一盤大生意嚟。有人計過數，一間一千一百平方呎嘅賓館，月收入高達廿一萬元，平均呎租遠遠跑贏山頂豪宅。所以呢，雖然新例實施後可能有四千間賓館面臨倒閉，怕只怕野火燒不盡，春風吹又生，更多賓館轉為地下經營，到時仲難監管啦。
講到底，無牌賓館掃之不盡，主要因為本港酒店房間長期短缺。有數得計，訪港旅客年年增加，由十年前嘅千幾萬增至舊年超過五千萬人次，相反酒店房間增加有限，目前只有七萬幾間咁大把，遠遠追唔上需求，如果當局一刀切取締晒所有住宅大廈裏面嘅賓館，旅遊業又點算呢？唔通要旅客吊吊揈流落街頭？
一句到尾，要根治賓館亂象，一定要雙管齊下，加強執法嘅同時，亦要增加酒店供應，否則顧此失彼，盞添煩添亂嘅咋！