政情：立會4月北上 議員要求多多
立法會經濟發展、工商、財經、資訊科技及廣播四個事務委員會打算外訪上海同杭州，初步定喺四月二十一至二十四日。幾個委員會尋日就舉行聯席會議商議行程，唔同議員都各有訴求，好似金融服務界議員張華峰（肥老闆）就覺得證券交易所要睇多啲；漁農界議員何俊賢就想睇陽澄湖大閘蟹，可惜行程得四日，似乎好難安排。
肥老闆被指想睇大閘蟹
另一議員黃碧雲見狀，就建議不如中間有啲行程分開行動，例如唔想睇證券交易所嘅議員，就喺同一個時段去睇大閘蟹，點知其他議員一聽到，隨即就話：「提議睇證券交易所嗰個先最想睇大閘蟹喎！」暗指肥老闆為食，令一眾議員捧腹大笑！其實肥老闆買開股票投資，應該最忌係「大閘蟹」至啱，一旦股市跌，成手「蟹貨」就弊喇！
肥老闆事後話自己一定去，事關佢覺得內地證券交易所對香港構成一定壓力，有需要去了解吓，但佢話大閘蟹喺四月唔當造，如果係八、九月去嘅話，就可以去睇吓，食番餐喎。乜呢個考察行程唔係要關注大閘蟹食用安全咩？