平民Dream Team強闖世錦賽
人面全非嘅美國男籃，將於本周六在土耳其展開世界籃球錦標賽摘金之旅。雖然「夢九」陣容缺乏星味，京奧金牌成員如勒邦占士及高比拜仁都不願參賽，但其他強隊又何嘗唔係缺乏當家球星？「夢幻隊」不再夢幻，亦代表再冇個人主義，球隊史無前例地團結之下，話唔定可以打出驚喜，一搔十六年之癢重奪世錦賽錦標！而「夢九」尋日在熱身賽以87比59擊敗希臘。
最冇星味夢幻隊
誓要繼九四年後再奪金嘅「夢幻隊」美國男籃，今屆卻沒有光環籠罩，勒邦占士、杜域侯活、韋迪及高比仔等所有○八京奧奪金功臣都不在陣中，「夢九」改由年輕球員掛帥，一半球員包括主力杜蘭特在內，都係年僅廿二歲以下，所以教練克爾澤維斯基（K教練）都選了比立斯及奧當兩名「七十後」球員，彌補經驗不足。其中比立斯嘅角色就如「夢八」傑特一樣，以其經驗扶助一眾生牯仔成長。
除稍欠星味外，「夢九」最大隱憂就係整體身高，名單中僅得剛轉投小牛嘅贊特拿屬於正中鋒，其餘路夫、奧當等內線球員都打開大前鋒，並非中鋒材料。對此K教練就希望所有球員都能夠出一分力，解決身高弱勢：「我希望五個位置都能夠幫手搶籃板及在內線防守。」美國曾經喺熱身賽試過搵杜蘭特打中鋒，睇嚟K教練都會有幾手準備。
身高輸蝕團結搭夠
雖然經驗及高度均輸蝕，但呢隊「夢幻隊」卻擁有非一般嘅團結、士氣及活力。主力杜蘭特表示冇大牌反令球隊更團結：「我哋冇個人主義，就算減少出場或出手機會都冇問題，大家只係一心想助國家重奪冠軍。」另一小將戴歷羅斯更揚言美國被人睇低仲有利：「○六年美國年輕且球星如雲，但球隊並唔團結，最終只得銅牌，今次我認為球隊可打出成績。」「夢九」尋日就以87比59大勝希臘，熱身賽四戰全勝，而杜蘭特奪得最高15分，為出發世錦賽前振聲威。
夢九最終12人名單
球員 （効力球隊） 位置
比立斯 （金塊） 後衞
史堤芬居里 （勇士） 後衞
艾歷哥頓 （快艇） 後衞
戴歷羅斯 （公牛） 後衞
韋斯布克 （雷霆） 後衞
伊古達拿 （76人） 前鋒
杜蘭特 （雷霆） 前鋒
基爾 （灰熊） 前鋒
格蘭加 （溜馬） 前鋒
奧當 （湖人） 前鋒
路夫 （木狼） 前鋒
贊特拿 （小牛） 中鋒
本報綜合報道