長官說，落區甚少被市民當面指口篤鼻辱罵，皆因港人大致斯文；不過有記者在場，情況就逆轉，咁講法，好似記者係罪人。長官又話，若年輕人表達意見斯文些，他很樂意聽。
長官此言差矣！皆因年輕人一來血氣方剛，二來墨水有限，要佢哋講嘢婉轉些，即係叫佢哋收聲；好似老朽略識文墨，更知世界艱難，自然不會「拋浪頭，當你流」，亦唔會「叻唔切，遲早摺」，講嘢總留一線，以便將來好相見。
漫畫家方成談幽默藝術，舉一個例：有一次，和朋友們在飯館裏吃飯。服務員端上我們點的燒雞，我嘗了，那服務員問：「味道好吧？」我說：「味道還好，就是歲數大了點。」人一聽都樂了。年輕人哪會顧及別人的感受，通常面一沉便從牙罅噴出豪情：你阿爺啊！韌過柴頭，不如食蕉！
又舉個近啲嘅例，副局政助自○八年上場以來，尸位素餐招怨，如果啲年輕人見到長官，佢哋必然怒氣沖沖噴晒火屎：「全部廢柴，炒Ｑ晒冇眼屎乾淨盲！」啲青年人血氣方剛，自然不會想到反面教材，原來做嘢未必多勞多得，最緊要命好！
老朽想話畀長官知，寫「我勸天公重抖擻，不拘一格降人才」的龔自珍，肯定唔係斯文人，去朋友家，講到興起，居然跳到桌子上跳舞，難怪佢摯交好友魏源寫信畀佢都忍唔住話：常恨足下有不擇言之病。之不過，龔自珍並不純粹是個詩人，他有經學的淵博、小學的嚴謹、雜學的恣肆……是以一個真正改革開放的長官，也要有聽狂言的胸襟，否則難有進步。