大帝12‧3熱火上身倒戈騎士

NBA公布2010-2011年球季賽程,今季最矚目球隊,當然係獲「大帝」勒邦占士加盟嘅熱火。根據賽程,勒邦占士會喺今年十二月三日(香港時間,下同),首次重返舊東家克利夫蘭同騎士碰頭,接受球迷嘅「熱烈歡迎」。另有報道指「大帝」為咗尋求精神指引,用六位數美金同一位猶太祭司會面。

重金搵猶太祭司指點

熱火新季集合韋迪、勒邦占士同保殊三大天王巨星,決心建立熱火王朝,所以好多球迷都關心佢哋嘅賽程,熱火首場就係硬仗,會喺十月廿七日作客有皮雅斯、加納特、雷阿倫及奧尼爾等球星壓陣嘅波士頓塞爾特人,呢場揭幕戰勢必引起哄動,球迷想睇直播就要請定假喇!

至於球迷最關心嘅「大帝」倒戈戰,會喺十二月三日上演,騎士將於主場迎戰熱火,另外三次常規賽碰頭分別係十二月十六日,二月一日及三月卅日,而另一位熱火主力保殊會喺明年二月十七日至首次倒戈,作客對舊球會多倫多速龍。

唔知NBA賽會係咪睇中熱火嘅叫座力,除咗揭幕戰安排大戰,聖誕節檔期亦安排咗熱火對湖人嘅重頭戲,呢場波隨時係今季NBA總冠軍前哨戰,記得預先寫定喺日曆喇!

美國傳媒亦報道「大帝」最近同一位猶太祭司會面,因為占士即將會有一次重大嘅商業決定,所以希望聽吓猶太祭司嘅意見,據悉「大帝」今次用咗六位數字美金先可得到祭司指點迷津。

T-Mac超低薪投活塞

另外,前NBA明星隊球員麥基迪剛同活塞達成協議,以自由身加盟,年薪只係底薪一百三十五萬美元,係佢上季嘅十八分之一,認真墮落!今年卅一歲嘅T-Mac麥基迪,當年効力魔術同火箭曾叱咤風雲,但近年因傷表現大不如前,佢今次加盟活塞,都係透過試訓先獲得一紙合約。