小牛咬碎金塊保西岸二哥

魯域斯基食大三元

今場賽事事關重大，皆因得勝者將可暫時坐穩西岸二哥位，小牛藉主場之利下開賽已狂攻金塊，首節過後亦搶得領先優勢。主隊下半場愈戰愈勇，魯域斯基單在第四節內，三分球3射3中，逐步將比分拉開，最終小牛輕鬆大勝16分，成功保住二哥位。魯域斯基今場貢獻34分、10個籃板及10次助攻，係十二年職業生涯間第二次獲得「三雙」，而對上一次已經要數到○八年二月。

其實魯域斯基能夠再嘗「三雙」滋味，都要多謝教練卡素爾，因為尾段佢知道愛將仲差一次助攻先夠數，所以垃圾時間依然讓其出場，魯域斯基賽後表示：「大家都在最後時刻配合我，讓我獲得助攻而完成『三雙』，我要多謝隊友們。」

爵士險勝紐約人升第三

有人歡喜有人愁，金塊當家射手安東尼今場就創下賽季得分新低，僅入10分，「甜瓜」失準亦成為輸波因素之一。當然，金塊自缺少需要醫治癌病嘅卡爾教練後，戰績持續下滑，今場已經係近六場常規賽第五次輸波，因同區嘅爵士以103比98險勝紐約人，現時已升上第三位，金塊就跌落第五。