塞爾特人劏牛靠食老
老牌球會塞爾特人，今季繼續畀騎士同魔術騎住，大有機會只能同鷹隊爭東岸第三種子，球迷都唔多睇好佢哋可以重奪冠軍。不過，自從「四大天王」各自擺脫傷患歸位後，近期「綠衫軍」愈戰愈勇，尋日更以102比93擊敗當紅部隊小牛，證明塞爾特人仲有本錢爭標。
塞爾特人出名係ＮＢＡ老人院，「四大天王」加納特、皮雅斯、雷阿倫及拉舒華萊士，最後生嗰個皮雅斯都年屆32歲，幾位老將今季輪流受傷，令戰績下滑。幸好佢哋近期都冇傷冇病，尋日均能上陣戰小牛，更藉皮雅斯與朗度尾段嘅關鍵演出，第四節反勝小牛，寫下常規賽四連勝，證明仍有力擊敗爭標分子。
皮雅斯29分冠全場
皮雅斯攻入全場最高29分，另有２次搶截，其中一次係尾段偷得魯域斯基嘅進攻，再交畀朗度走籃，隨即判小牛死刑，至於朗度就拿下「雙雙」20分及10個籃板球。小牛打得最好係魯域斯基貢獻28分，而今場亦係佢哋近三戰第二場輸波，狀態明顯回落。
另方面，籃網嘅中國球手易建聯休戰六場後尋日對速龍復出，不過手感只屬一般，僅得10射３中入９分，搶下５個籃板球及造出２次封阻。實力較優勝嘅速龍就以100比90擊敗籃網，結束作客六連敗。
本報綜合報道