好多人新年大計之一都係keep fit減肥多做運動，之但係幫襯相關服務時真係要打醒十二分精神，事關萬一唔好彩遇上不良銷售手法，分分鐘畀人鋸到一頸血㗎！
呢嗱，話口未完又有人中招喇。有市民投訴，喺街度被健身中心職員以試玩為由帶上中心，用萬幾銀簽咗一年合約，點知當晚被人無喇喇改為兩年合約，信用卡扣帳則增加一倍，翌日事主到中心試堂，再被多名大隻佬職員車輪式游說碌卡約五萬銀，就係咁前前後後總共唔見近十萬蚊，對於月薪只有一萬嘅事主嚟講，簡直係天文數字。最離譜嘅係，事主之後向警方求助，對方居然關人個關，不予立案。喂，你班差大哥平時老屈小市民、砌人生豬肉唔係好積極嘅咩，非禮女下屬、警署當陽台唔係好過癮嘅咩，家陣叫你幫吓小市民都托手（月爭），過分啲啩！
講番呢單畸士，涉事公司話有晒閉路電視同錄音紀錄，又話即使網上過數都有單有據，真相係點仲要查過至知，但類似嘅糾紛三日唔埋兩日就一單，你話當中冇無良業者劏客，三歲細路都唔信。前排有健身教練懷疑為咗「跑數」，訛稱可以幫個簽咗長命約嘅客「贖身」，結果事主「贖身」不成，反而額外簽多兩萬幾蚊課程合約，蒙受雙重損失，問你怕未。
冇錯，牛唔飲水唔撳得牛頭低，消費者只要企硬say no，甚至揚言報警，諒對方都唔敢亂嚟，問題係，好多人喺群眾壓力下早就六神無主，大失分寸，仲邊有咁冷靜吖。不可不知，一旦消費者一手交錢，米已成炊，事後追究唔係話咁易，即使警方「皇恩浩蕩」立案受理，涉事公司亦會諸多藉口，唔係賴唔知情，就係話已經炒咗個職員，再唔係就承諾個客簽幾多錢就提供番幾多服務，到頭來好可能又係審死官。
數字最能說明問題，消委會舊年頭十一個月，淨係接獲關於健身中心嘅投訴已經達一千六百幾宗，比一四年增加兩倍咁滯。新修訂《商品說明條例》話就話實施咗幾年，但至今未有健身中心因不良營商而被定罪，頂多只係搵前線員工祭旗。殺頭生意有人做，不良銷售禁之不絕，講到尾咪就係官僚助紂為虐囉！
所以話，要杜絕呢類消費陷阱，話易唔易，話難唔難。只要為預繳式消費實施強制冷靜期，消費者期內可以隨時取消合約，店家逼到個客簽單都冇用，問題自然迎刃而解。港府要改例，市民舉腳贊成，政客亦唔敢阻頭阻勢，如果連咁嘅舉手之勞都懶得做，想唔認「冇神經政府」都唔得喇！