試想像有條友去餐廳食咗一千銀嘢，點知銀包得八舊水，居然惡人先告狀，話找唔足數唔代表走數，仲叫店家好好反思「找數」嘅定義。呢嗱，世上真係有呢種人辦㗎，人稱「吳得掂」嘅教育局局長吳克儉就係其中嘅表表者嘞。
免費幼兒教育拖咗咁多年，終於喺下學年實施，本來係一件好事，點知結果只係得半桶水，八成半日制幼稚園係免費，餘下兩成要收學費。對於輿論批評當局「走數」，吳局長冇你咁好氣，架起二郎腿噏咗一大串道理，話免費教育唔代表全部免費，八成學校免費已算達標喎。咁都未止，佢仲希望大家唔好用太硬、太狹窄嘅定義去理解「全日免費」，反而應該了解整體社會財政及資源嘅承擔力咁話。
咁點解免費幼教又要交學費呢？吳得掂特別舉例，幼稚園師生正常比例係一對十一，如果有人鍾意一對五咯喎，就要自己負擔額外費用，咁做唔係「走數」，而係增加家長同辦學團體自由度。呢嗱嗱嗱，吳得掂真係好嘢，唔止識得欣賞富士山紅葉、制服學生妹，講起歪理上嚟亦係頭頭是道，面皮厚成咁，唔做官真係嘥晒。
根據吳局長嘅邏輯，同樣係小朋友讀幼稚園，有錢嘅可以享受更高質素教育，冇錢嘅焗住將貨就價。家陣啲直資中小學咪就係咁囉，你話佢私立咩，又有大量公帑資助；你話佢公立咩，喺收生、師資以至收費等可以自己揸fit，依家當局想將呢一套推廣到幼兒教育，唔使問阿貴，結果只會將清貧子弟拒之門外，進一步製造社會分化同不公。
呢，真係打針都冇咁快就見效，喺新制度下，部分幼稚園收費水平仲高過實行學券制嗰陣時，有全日制幼稚園每月額外收超過二千元，你叫基層家長點頂？最近有團體調查發現，超過八成半幼稚園指免費幼教資助額不足以應付基本營運開支，近八成預計未來三年要加學費。有人批評免費幼教係不倫不類嘅A貨，可謂一針見血。
港府對幼兒教育口爽荷包立，講到尾都係守財奴作風使然。講真，相比起基建超支，呢度唔見幾十億，嗰度唔見百幾億，全面資助幼稚園只係九牛一毛啫，當局就一味算死草，呢啲唔係善財難捨，冤枉甘心又係咩呀？
冇計喇，癡癡呆呆，坐埋一枱，今屆政府拉雜成軍，濫竽充數，有邊項政策唔係走數，有邊個高官似番個人樣㗎？正如有教育團體形容，吳得掂領導無能係社會唯一共識，「走數局長」呢個朵，吟詩都吟唔甩嘅嘞。