現屆政府被批評為「走數」政府，特首梁振英更有「走數大王」之稱，一啲冇冤枉o架。當初為咗博取民望上台，空頭支票開完又開，好似觀音菩薩咁有求必應，到咗家陣時日無多，市民要求找數，結果仲慘過乞米，民怨沸騰有乜出奇吖。
嗱，房屋問題就係其中一張最大嘅空頭支票嘞。大家一定記得，現屆政府上台冇耐就定下十年建屋大計，以四十八萬個單位為目標，公私營六四比，吹到天花亂墜咁款。點知講就天下無敵，做就無能為力，好快就側側膊唔多覺，早前已將目標下調至四十六萬個，可惜吖，目標下調一樣唔達標，運房局局長張炳良話喎，目前已覓得嘅土地頂多只夠興建廿三萬六千個公營房屋單位，即係仲差四萬幾個單位先至達標，形容係一個警號，仲話「唔好只向政府追數，成個社會都要面對」喎。
喂！市民唔向港府追數，向邊個追數喎？乜嘢「房屋問題係重中之重」，乜嘢「見縫插針、寸土必爭」，乜嘢「新界東北發展大計」，仲要「填海造地」、「拓展大嶼山」，統統都係港府噏出嚟嘅，家陣一個屈尾十就想賴帳，怨天尤人，推卸責任，知唔知醜字點寫o架？廣東俗語「屙屎唔出賴地硬」，講嘅咪就係呢班港府廢柴高官囉！
冇錯，拓土建屋係有阻力，但邊個社會都係咁嘅喇，又唔係單單香港先有阻力，更加唔係依家先有，人哋政府可以解決問題，港府就做唔到，講到尾咪係自己無能囉。大家有眼見，建屋數量嚴重不達標，欠債只會愈來愈重，無殼蝸牛只會慘上加慘，呢，公屋輪候冊就快突破三十萬大關，所謂三年上樓承諾早成夢幻泡影，搞到劏房遍地開花，有乜法子唔激起民怨吖。
都係美國前總統列根講得啱，政府唔係解決問題嘅方法，政府本身就係問題所在。有瓦遮頭係最基本人權，為市民提供房屋係政府最基本職責，港府拓土建屋一味畫餅充飢，仲搵埋成堆藉口開脫，將責任推畀社會，簡直唔得佢死。淨係橫洲發展風波咋，咪就係當局厚此薄彼至搞到一鑊泡囉，難為張局長仲大言不慚話要釋放棕地增加土地供應喎，吹水就易咯。
唔講猶自可，講起就把幾火，港府高官攞一流薪酬，交九流貨色，走數當食生菜，煲冇米粥多過食飯，唔減人工都算好彩喇，仲好意思提自肥建議，獅子開大口所有高官加薪一成有多，面皮簡直比恐龍皮仲厚！冇符喇，呢屆政府進入倒數期，官僚就話拍拍屁股走人啫，但房屋問題呢個爛攤子解決唔到，香港想有運行都幾難。