早排網上流傳一篇文章，講家陣港女嘅十大擇偶條件，結果公屋住戶竟然遠勝供緊樓嘅樓奴。咁又係吖，公屋租金平，配套好兼夾免費維修，賺幾多都係自己嘅，真正實現財務自由，難怪咁多超級富戶賴死唔走喇！
公屋單位被濫用，並唔係今時今日嘅事，大家去嗰啲「富貴邨」兜番轉，周圍泊滿唔少名車，就知道咩叫禾稈冚珍珠。針對呢啲隱形富豪，房委會尋日宣布由明年十月起收緊富戶政策，由以往規定入息及資產均超出上限先要搬走嘅「雙軌制」，改為是但一瓣超標就冇得留低。其中住戶入息上限定為不逾入息限額五倍，資產就規定唔超過入息上限一百倍。
好明顯，房委會有關新措施係要堵塞過往嘅制度漏洞。以立法會議員「長毛」梁國雄為例，一人家庭入息上限大概萬一銀，佢老哥每月人工九萬過外，超出上限五倍成一大截；之不過資產呢家嘢有好多走盞位，只要報條數唔過限額就得。大家有眼見，佢老哥成日以「丐幫幫主」自居，但就不斷有老闆泵水，腦滿腸肥，豬籠入水，仲好意思長期霸住間公屋，雖然人人喊打，但當局始終吹佢唔脹，新制度下長毛呢類例子終於有機會被叮走，咁就公道得多嘞。
加快公屋單位流轉，協助輪候人士盡快上樓，大部分市民舉腳贊成，但亦有人批評房委會胡亂向公屋居民開刀，轉移公屋供應不足嘅視線；亦有人話目前全港只有兩千多名公屋戶需要交雙倍租金，質疑收回嘅單位只係杯水車薪。嗱，咁講就唔啱喇，公屋係珍貴嘅社會資源，幾時都應該分配畀最有需要嘅市民，既然超級富戶可以喺私人市場解決住屋問題，就冇理由容許佢哋長期鵲巢鳩佔。呢個唔係數目多少嘅問題，而係公義嘅問題。
至於話騰出單位數量太少，其實好可能反映當局以前執法不力。申訴專員公署之前調查房署執行公屋租戶審查同監察制度，發現漏洞多多，亂象叢生，獲重複分配單位嘅大有人在，甚至有人一家霸住三間屋，問你怕未。最誇張嘅係，當局試過抄錄一萬個公屋單位嘅水錶，結果發現當中七百個錄得零耗水量或超低耗水量，到底濫用公屋情況係咪被低估，不言而喻。房署唔係唔知問題嚴重，亦曾經成立特別小組加強抽查，可惜最終又係雷大雨小。今次嘅辣招會唔會重蹈覆轍，仲要睇過至知。
或者有人會話，要加快上樓時間，歸根究柢都係增加公屋供應。喂，鬼唔知阿媽係女人咩，莫講話港府覓地建屋無能，公屋供應缺口愈來愈大，即使進展順利，遠水亦難救近火，官老爺住洋樓養番狗，就話等幾耐都冇所謂啫，唔通叫班無殼蝸牛繼續住豬欄雞棚改裝嘅劏房吖！