未入正題之前，先同大家講段古。話說北宋末代皇帝欽宗改國號靖康，當時有人將兩個字拆成「十二月立康王」，估唔到一語成讖，皇帝無耐真係畀金人擄走，而宋室南渡同年嘅十二月，又真係擁立康王趙構，亦即係後來嘅高宗即位，你都咪話唔邪門。
唔怕生壞命，最怕改壞名，皇帝年號係咁，領導人府邸亦係一樣。呢嗱，堂堂特首官邸，有咁多名唔叫，偏偏叫「禮賓府」，結果主人嘅命運亦好似賓客咁，冇個住得長，曾爵士七年任期，身敗名裂，倉皇辭廟；CY本來磨拳擦掌預備大幹十年，最終都係做得五年就灰溜溜下台，唔到你唔信邪。
大家有眼見，連同第一任嘅老董，三位特首冇一個打破「十年魔咒」宿命，有堪輿學家就認為一日都係「禮賓府」改壞名累事，作為七百萬港人之首竟然唔做主而做賓，即係「以下犯上」，咁搞法香港想唔內亂不止，社會撕裂都幾難。咁又係吖，回歸後香港人當家作主，反而特區之首「反主為客」，點講都講唔通。仲有吖，「禮賓」「禮崩」，真係大吉利是，唔怪得回歸後香港烏煙瘴氣，禮崩樂壞喇。
咪以為迷信嘢不足為憑吖。好似風水學嘅「左青龍，右白虎」講法，其實即係依山面水，從心理學角度解釋，屋企貼近自然環境，屋主又真係零舍精神爽利。達官貴人就最信呢套嘅嘞，回歸後老董堅持唔肯入住港督府，除咗擔心港英政府喺入面安裝竊聽器，以及想向北京「交心」，表明自己同港英劃清界線，最主要仲係風水問題，事關港督府附近嘅中銀大廈落成後，外形三尖八角成碌「頂心杉」咁，對港督府造成沖煞，時任港督尤德就係喺訪問北京期間猝逝，你話唔驚就假。
話時話，回歸後曾有人提議以港督府深紫色屋頂命名為「紫廬」，但聽講因為「紫廬」上海話聽起嚟似「豬玀」，犯咗某人忌諱而被否決，跟住拖吓拖吓，拖到後來唔知點解就變成依家呢個不倫不類嘅「禮賓府」嘞。
真係諗極都唔明，以前港英年代叫港督府一直相安無事，回歸後蕭規曹隨，應該叫番「特首府」或者「特首官邸」。如果真係要接待外賓，府邸佔地咁廣，大可以喺特首府旁邊另闢禮賓廳。當然喇，如果學似澳門咁樣，禮賓府淨係用嚟接待外賓，特首另擇住處，保留現名都無妨嘅。
一句講晒，名不正則言不順，言不順則事不成，禮賓府一日唔改名，香港一日冇運行。下任特首就算唔為七百萬市民福祉，都應該為自己仕途着想喇，下話！