急症室收費加倍 小市民百上加斤

嗱，醫管局尋日通過公立醫院檢討報告及收費建議，包括急症室收費由一百元勁加至二百二十元，住院收費由每日一百元大增至一百五十元，普通科門診及專科門診首次收費亦由每次四十五元及一百元，分別加至六十一元及一百七十元。雖然加價建議話就話仲要交食衞局審批，不過咪畀功夫茶批中，呢啲都係走過場嘅咋，收費就加硬，爭在係咪加到足咁解。

當然啦，醫管局加價梗有好多冠冕堂皇嘅理由，首要原因係急症室濫用情況嚴重，唔少人有理冇理走去睇急症，唔止搞到大排長龍，仲令到醫護人手更加緊絀。另外又話急症室已經十幾年冇加價，隨着服務成本不斷增加，政府資助比率愈來愈高，已經遠遠追唔上通脹，有必要加價咁話。

即係咁，急診濫用問題的確存在，但乜嘢叫做濫用好難定義啫，為咗打擊濫用而懶理基層死活，就更加係麻木不仁。冇幾耐之嘛，高官先至沾沾自喜話社福開支大增，感到好驕傲喎，家陣醫管局突然大幅加價，打劫市民荷包，咪即係自打嘴巴囉。再講吖，公共醫療係社會福利，唔係私營企業，港府庫房水浸，有咩必要急住跟隨市場加價呢？何況加價之前，係咪可以考慮節流呢？係咪要加到咁勁咁狼呢？醫管局一味肥上瘦下，對市民斤斤計較，點都講唔通喇。

其實心水清嘅都睇得出，港府搞咁多嘢，無非都係將公共醫療視為財政包袱，卸得就卸。大家有眼見，由自願醫保到擴展私家醫院再到急症室加價，目的都係得一個，就係幫公營醫療減磅，將市民推向私人市場。嗱，家陣公院急症室建議收費同私家醫生嘅收費差唔多，畫公仔已經畫出腸嘞。

不過咁，如果當局以為將市民趕向私人市場就一天都光晒，只係一廂情願嘅咋。道理好簡單，醫護人手嘅培養追唔上醫療服務嘅需求，港府又大力發展私家醫院，前朝提出嘅醫療產業又再回魂，公院醫護人手流失勢必更加嚴重，到時唔止十個煲七個蓋，隨時變成十個煲六個蓋甚至五個蓋，公院爆煲咯喎，最終受害嘅咪又係基層市民！

今時今日嘅香港，衣食住行皆不易，生老病死樣樣難，鬼叫港府咁無能又刻薄咩，基層市民只能自求多福，千祈唔好病呀。