爭議多多嘅高鐵工程終於傳嚟好消息，港鐵主席馬時亨拍心口話，有信心如期二○一八年第三季通車，亦唔會再超支，總算還得神落。不過咪開心得太早，事關更棘手嘅「一地兩檢」問題仲未解決，隨時爆大鑊嘅咋。
即係咁，距離高鐵通車只有一年多，係時候就通關問題作出決策嘞，難怪馬時亨都好心急，講明港府必須喺未來半年解決「一地兩檢」同埋營運權嘅問題，以免夜長夢多。咁又係呀，目前港鐵嘅角色只係負責將鐵路建好，有冇營運權都係未知之數，港府一味唔嗲唔吊，議而不決，根本唔係路。
講到「一地兩檢」咯喎，真係好頭痕。你知喇，反對派最鍾意上綱上線，唔係話一地兩檢違反《基本法》，破壞一國兩制，就係扣上出賣香港嘅帽子，總之講到洪水猛獸咁款。根據港府一遇反對聲音即跪低嘅往績，隨時畀反對派拋窒都似，萬一「一地兩檢」胎死腹中，高鐵變成慢鐵，八百多億元公帑付諸流水，納稅人想唔喊得一句句都難。正如馬時亨話齋，高鐵總站係根據「一地兩檢」嘅需要而建造，如果立法會議員審議方案時係都要玩嘢，愈拖愈遲，受害嘅始終係市民咋。
可惜吖，江山易改，本性難移，指望反對派高抬貴手喎，咪即係對牛彈琴。淨係之前嘅高鐵超支撥款申請咋，立法會淪為鬥獸場，你話爭議更大嘅「一地兩檢」問題，佢哋點會輕易收手呀？家陣港獨、本土思潮氾濫成災，有啲人係都要逢中必反，雖然中央果斷釋法大大打擊港獨氣燄，之但係百足之蟲死而不僵，佢哋會唔會利用「一地兩檢」問題再生事端，冇人講得埋㗎。
話時話，高鐵明明係國家送畀香港嘅大禮，可以令香港融入「四橫四縱」高鐵網，享受內地龐大嘅人流同埋商機，有百利而無一害，有啲人係都要為反而反，危言聳聽，簡直不可理喻。其實心水清嘅人都知，「一地兩檢」不但唔係洪水猛獸，反而係為咗通關便利而實施嘅一站式安排，歐美早有先例，單係深圳灣口岸咋，多年前亦已實施，點解港方人員喺內地執法就冇問題，掉番轉頭就唔可以呢？點解歐美唔同國家都做得到，偏偏一國兩制下嘅香港就做唔到呢？反對派平時言必國際標準，點解今次又例外呢？
大家睇到喇，反對派一時一樣，雙重標準，神又係佢鬼又係佢，講到尾就係有不可告人嘅政治目的。正所謂豫則立，不豫則廢，香港繼續蹉跎落去，當老本食盡，競爭力無以為繼，唔通反對派會養起全港七百萬人咩！