泊車仔懷疑因利益問題被黑幫毆斃；南亞漢持刀斬傷有黑幫背景男子；豪宅連環遭內地匪幫爆竊並發生綁架案；蘭桂坊有醉娃被強姦；警隊高層向下屬傳下體大特寫淫照進行性騷擾……近日香港治安事件頻生，好多嘢表面睇好似風馬牛不相及，實際上有密不可分嘅關係，唔信？等功夫茶解過你哋聽喇！
嗱，如果話一般男性下身充血，大腦缺血，往往會失去理智，做盡蠢事，咁警隊中人自己支炮都管唔住，身上佗嘅另一支炮又點會聽使吖。呢，聖誕又到，觀塘警區搞聯歡活動，結果就搞出事嘞，有警司級人員涉嫌對多名女警作疑似性騷擾行為，形容對方「長腿」、「大波」及「着超短裙」又抽水，唔知仲以為拍緊AV添，據聞當時有男同事睇唔過眼出手阻止，結果幾乎畀人揼一身。一波未平一波又起，同一警區最近又爆出男高層向女下屬傳送下體裸照，直情唔知「醜」字點寫！
話時話，警隊春色無邊，早就唔係今時今日嘅事。前排之嘛，有警長涉嫌喺港鐵報案中心非禮兼襲擊同袍，連窩邊草都飛擒大咬，對其他人更加唔會客氣，唔怪得警署當陽台，非禮甚至強姦報案人事件接二連三。你話嘞，對於呢啲春情勃發嘅執法人員嚟講，眼中只有豐乳盛臀，就算歹徒額上雞乸咁大隻字鑿住「黑社會」又或者「賊佬」，佢哋都一樣視而不見嘅咋！
當然，警隊內部烏煙瘴氣，醜聞仲厚過本電話簿，絕對唔止衰鹹濕咁簡單。今年年中警署夾萬逾百萬港元保釋金失竊，就係家賊所為；至於其他涉嫌為黑幫通風報信、包庇南亞人蛇犯罪集團等，更加係沒有最醜，只有更醜。
正如有人話齋，一個地方老鼠猖獗為禍，唔使問阿貴一定係貓偷懶。睇番今時今日警隊，上層有上層不務正業，一門心思拍住個大老闆搵真銀；下層有下層胡作非為，亂七八糟，成個警隊不成體統，睇見都眼冤。正如嗰啲懶貓咁，終日唔係食就係瞓，唔係瞓就係玩，生物本能用進廢退，莫講話捉老鼠，見到老鼠唔嚇到掉頭走已經偷笑喇。
咁就難怪警隊形象不斷插水，民望長踞紀律部隊包尾大幡，「黑警」之名叫到開巷喇。近排警隊更換facebook封面照，一名軍裝及便裝警員狂追口罩賊人，諗住懶型仔改善吓形象，點知弄巧成拙，網民負評如潮，簡直唔衰攞嚟衰。
一句到尾︰物必先腐而後蟲生。警隊從上爛到下，從內爛到外，香港由「亞洲最安全城市」淪為危機四伏嘅葛咸罪惡城，有乜出奇吖！