聖誕剛過，新年就到，無論係立法會嗰班搞事政客抑或「吳得掂」等一眾高官，無不趁呢個空檔出埠散心，市民滿以為可以安安靜靜過個新年，可惜吖，最應該攤抖嘅假難民年中無休，聖誕新年「照常營業」，大節流流搞到雞犬不寧，真係唔得佢哋死。
嗱，就呢兩三日之嘛，港九各區發生多宗涉及南亞裔人士嘅暴力案件，唔係情侶因為金錢瓜葛大打出手，就係持行街紙巴籍漢被同鄉圍毆爆頭；唔係大庭廣眾下搶旅客嘅錢箱及黑社會式行刑，就係自己人窩裏鬥。再咁落去，容乜易搞出更大件事㗎！
呢，歐洲各國就係樣辦，愈收得多難民嘅國家爆得愈多恐襲，你哋話嘞，人哋主力收容逃避戰火嘅真難民，尚且搞到七國咁亂，香港搞聲請嗰班十個着咗九點九個都係流嘅，港府東郭先生上身，引狼入室，簡直愚不可及。
話時話，包括本報在內嘅社會各界，多年來一直呼籲港府退出聯合國《禁止酷刑公約》又或者重設禁閉營，徹底消滅假難民來港誘因，當局一直闊佬懶理，關人個關，如果唔係民意壓力太大，可能連最近推出嘅印度客入境嘅網上登記制度都慳番添呀！
講起上嚟真係幾諷刺，以前殖民地時代英國佬高高在上，香港華人淪為二等公民，估唔到九七回歸以後，「二等公民」頭銜由內地同胞接力頂上。唔係咩，南亞兵團壓境，無論係偷渡又好，打黑工又好，投奔黑勢力食大茶飯都好，只要舉手聲請免遣返，一張行街紙在手，鍾意賴幾耐都得，好彩遇着個青天大老爺，重金禮送埋你回鄉又點話。內地偷渡客就冇咁幸福嘞，即捕即解無得商量，呢啲咪同人唔同命囉。
好多人話港產官僚碌碌無能，軟手軟腳，其實睇吓對邊個嘅啫，對住班孔武有力嘅外國兇徒就係，對住自己同胞咯喎，仲唔手起刀落殺無赦咩。內地孕婦來港產子引起民怨，港府實行「零雙非」政策；奶粉畀水貨客搶購，港府「限奶令」侍候；內地旅客財大氣粗令人眼紅，「一簽多行」即刻改為「一周一行」。講真，唔理係內地孕婦、搶奶大媽，定係國產土豪，真金白銀使錢，都叫做對經濟有啲貢獻，港府對財神爺防賊咁防，但對禍港殃民嘅假難民反而無任歡迎咁款，呢啲到底係咩道理，你話係咪神經錯亂，不識好歹？
冇計喇，「內鬥內行，外鬥外行」從來係中國人嘅劣根性，港產官僚係咁，港獨勇武派係咁，嗰班假仁假義、沽名釣譽嘅無恥政客亦係一擔擔。香港內地矛盾激化，依家知點解喇！