富蘭克林講過，交稅同死亡係人生中兩樣無法避免嘅嘢，對於港人嚟講，應該加埋第三樣，就係「政治爭拗」。尋日除夕，正當大家諗住可以靜靜送走二○一六年，點知結果又係吵吵鬧鬧，簡直吹脹。
話說港府早排失驚無神宣布喺西九文化區興建故宮文化博物館，結果因為被指諮詢不足，鬧到滿城風雨，西九董事局尋日凌晨緊急解畫，自爆身兼董事局主席嘅政務司司長林鄭月娥，早喺舊年上半年諮詢董事局資深成員，並且聯同民政事務局官員進行項目簡介；又話擬建嘅總樓面面積同建築物高度都冇超逾相關限制，唔需要城規會規劃許可及進行相關諮詢喎。
反對派當然唔肯就咁收貨喇，佢哋死咬住兩點唔放，就係點解港府事前冇進行公眾諮詢？點解繞過立法會，淨係同董事局成員「摸底」就算？林鄭同西九管理局行政總裁等人，嚟緊星期五出席立法會內務委員會特別會議，接受議員質詢，相信到時有排解畫。你知喇，呢輪正值特首選舉敏感時期，有人嚟緊可能身份有變，反對派唔同你玩鋪勁就有鬼，呢鑊嘢睇怕有排都未收得科。
即係咁，故宮文物破例借畀香港無限期展出，你話係中央送大禮又得，但係依家交通咁方便，想睇故宮文物，坐兩、三粒鐘飛機上北京就得，有冇必要喺香港搞展館，的確值得討論，但可以肯定嘅係，今時今日中港矛盾咁尖銳，凡親掂到內地嘅嘢，一律難逃被政客抹黑嘅命運，主事官員咁都預計唔到，簡直蠢到冇朋友。
當然喇，就算政客點樣無事生非都好，如果港府跟正規矩做，就唔會授人以柄，搞出個大頭佛。事實又係喎，莫講話公眾被蒙在鼓裏，連身兼西九董事局成員嘅立法會議員，都係對上兩個月至知，「黑箱作業」呢條罪名，真係吟詩都吟唔甩。
最好笑嘅係，呢鑊嘢啱啱爆嗰陣，高官仲未知驚，仲以為好過癮，話自己做到「滴水不漏」喎，點知畀人鬧得幾鬧當堂失晒魂，一時話「諮詢有難度」，一時硬拗送熊貓都唔使諮詢，一時又話唔想中央尷尬。結果反而講多錯多，愈描愈黑，畀人批評向中央擦鞋獻媚不特止，「洗腦」、「文化統戰」、「另類國民教育」等大帽子更係通處亂飛，呢鋪中央真係唔慌唔尷尬。
從阿爺角度出發，原本諗住送份大禮過港人，結果因為港產官僚愈幫愈忙，畀人陷於不義，搞到灰頭土臉。下任特首四大條件，愛國愛港、具管治能力以及港人擁護嘅或者唔難搵，但講到「中央信任」咯喎，畀少啲蕉皮中央踩已經偷笑喇！