香港人生活壓力沉重，好多人唧都笑唔出，仲有調查顯示香港人快樂指數偏低添。其實又唔使咁灰嘅，套用網絡潮語，「識得笑，其實好好笑」，只要大家換位思考，香港真係有好多笑話㗎。
嗱，淨係講西九文化區吖，起足八年都仲係爛地一塊，施工效率仲低下過第三世界，叫做西九笑話區就差唔多。八年唔係短時間，神舟飛船都唔知第幾次上太空嘞，美國同台灣都改朝換代嘞，所謂「世界級文化樞紐」連影都冇，唔笑死人就假。難怪「東方報業民意調查」顯示，受訪者一面倒批評港府不思進取，監管不力，白白錯失文化產業帶動經濟機遇喇。
仲有喎，西九二百多億元工程撥款早就使得七七八八，頂多能夠應付前兩期工程開支，包括大劇院在內嘅第三期核心工程無以為繼，都唔知點收科。今時今日，港府想立法會通過追加撥款難如登天，早排話要同西九管理局諗計融資喎，其實乜鬼融資大計吖，羊毛出自羊身上，最終都係打劫納稅人荷包咋。如果最終融資不成，西九爛尾收場，咪又係一個大笑話囉！
話時話，咪睇西九仲係一塊爛地，高層一樣豬籠入水咋。有數得計，西九行政總裁年薪逾五百萬元，七位高層夾埋就差不多二千萬元，冇嘢做有錢收，睇吓報紙吹吓水又一Day，呢啲咪叫絕世筍工囉。最可笑係行政總裁「八年換三」，換極都係洋人，第一位洋總裁做咗唔夠半年就以健康理由辭職，返回英國祖家即刻變成游水龍蝦咁生猛，港府擺明畀人搵笨喇；第二個洋總裁來自澳洲，又係冇幾耐就以家人健康為由走夾唔抖；第三位係就係來自香港，不過又係紅鬚綠眼。真係諗極唔明，唔通洋和尚會唸經咩？唔通七百萬人都搵唔到合適人選咩？唔通中國人唔懂文化咩？你話港府唔係崇洋媚外都冇人信啦。
幾時都話，冇咁大個頭唔好戴咁大頂帽。香港人炒樓炒股就叻，如果真係咁有文化修養，香港就唔使畀人叫做「文化沙漠」啦。至於一班高官咯喎，飲紅酒吹水就在行，霸地僭建就耍家，叫佢哋欣賞「鬼佬大戲」喎，隨時瞓着都似。所以話，港產官僚附庸風雅，好大喜功，用幾百億搞個爛攤子出嚟，隨時得物無所用，世界級文化樞紐想唔變成世界級笑話都幾難。
冇計嘞，港府向來眼高手低，志大才疏，唔止西九淪為笑話，十大基建直情變成十大醜聞。計功夫茶話齋，與其倒錢落海，不如斬纜止蝕，橫掂西九位置靚絕，改為公園畀市民踩吓單車、睇吓風景咪好囉，何必係都要阿茂整餅啫。