又到聖誕，又到聖誕。聖誕節唔止係普天同慶嘅大日子，仲係旅客出入境高峰期，機場肯定忙到飛起，不過咁喎，新空管系統頻頻甩轆，大鑊爆完又爆，到底靠唔靠得住，真係講唔埋㗎。
嗱，繼「消失的十二秒」同埋「消失的廿六秒」後，新空管系統再創新 猷，搞出「消失的七十五秒」驚險事件，諗一諗都牙煙。如果唔係新空管系統咁問題百出，民航處都唔會成立專家小組查找不足喇。
專家小組尋日第一次開會，到底有冇搵出問題就唔知，淨係聽到民航處處長李天柱人肉錄音機上身，唔係話綜合專家意見，新系統符合國際要求，運作初期出現不可預計嘅情況係無可避免，就係話承辦商已經有解決方案，過埋聖誕新年高峰期，就會將新軟件安裝至主系統測試。至於公眾最關心嘅「消失的七十五秒」，佢就話係因為前線員工唔熟手所致喎。總之千錯萬錯，都唔係新空管系統嘅錯啦。
正所謂，講乜嘢唔重要，做乜嘢先至重要。如果新空管系統真係乜嘢問題都冇，民航處使乜要求承辦商諗計更新軟件呀，又使乜成立專家小組整色整水呀。正如立法會議員話齋，新系統唔止出現航機失蹤，仲有鬼影同埋疊機等問題，擺明入錯貨啦，購入同一系統嘅印度機場已經停用，杜拜機場更索性改由人手寫紙仔代替，民航處仲大事化小，唔通真係要搞到機毀人亡先至安樂？
冇錯，新系統需要磨合期，之但係磨合期都要有個限度吖，正因為新系統甩甩漏漏，當局先至花四年時間修補，點知補完好似冇補過一樣，不論測試期間定係正式運作都亂象不斷，證明唔係磨合問題咁簡單，而係新系統本身就百病叢生，唔多靠得住。民航處一味拿磨合期說事，仲有冇離譜啲吖。
講真，新空管系統關乎航空安全，涉資額更高達十五億元，採購時點止貨比三家，直情應該驗屍咁驗，偏偏民航處闊佬懶理，仲求其過買棵菜，唔出事至奇。所謂過咗海就係神仙，承辦商早就將巨款袋袋平安，仲點會認真解決問題吖，到底當初係邊個茂里拍板決定買入呢個甩轆系統，當中有冇唔見得光嘅勾當，唔通港府冇責任調查嘅咩？如果唔係港府盲目縱容，民航處又點會好似獨立王國咁，搞到烏煙瘴氣、亂七八糟吖？
講到呢度，功夫茶諗起官場上嘅「馬房文化」，一班惡吏恃住有大佬包庇，山高皇帝遠，圍威喂作威作福，臭屎密冚。所以話，下屆政府邊個上場都好，必須出手整頓民航處，咪任由佢哋攞乘客性命較飛吖！