新曆年啱啱過，農曆年就快到，又係各式運程書賣通街之時。有大師話今個雞年行金水流年運，屬「金」嘅行業好似話銀行、保險、投資等等最當旺，查實仲有一個屬「金」嘅行業，今年一樣有運行，之唔係嗰班做沒本錢買賣嘅賊佬囉！
唔係誇張㗎，就元旦之嘛，大埔村屋單位遭到爆竊，事主損失近三十萬元財物，甚至成個夾萬都被抬走；九龍城一個單位亦被賊人光顧，掠走十三萬元；仲有就係南亞匪徒當街搶劫印度遊客。連同近排接連發生涉及內地犯罪集團嘅富豪住宅爆竊案，以至山賊打劫行山市民事件，數到天光都數唔晒，用「盜匪如毛」嚟形容今時今日嘅香港，真係一啲都冇誇張。
點解香港會搞成咁？「東方報業民意調查」顯示，大部分市民歸咎於警方破案能力不足，變相刺激更多匪徒來港食大茶飯，令香港淪為不法之徒嘅提款機。冇錯喇，一個地方老鼠橫行，唔使問阿貴，一定係貓偷懶唔做嘢，正如警隊醜聞爆個不停，唔係上司非禮女下屬，就係監守自盜，再唔係就受賄交換機密資料，沒有最離譜，只有更離譜。《警訊》自己都識講喇，賊人取易不取難，如果唔係警方本身醜聞多多，自顧不暇，佢哋又點會咁有恃無恐吖！
近排電視台重播以警察為主題嘅連續劇，當中主角個個嫉惡如仇，正氣凜然，真真正正做到「專業高效」、「廉潔奉公」，只可惜時移勢易，冇呢支歌仔唱好耐咯。今日嘅警隊，已經倒退到好似上世紀六、七十年代嘅有牌爛仔咁，捉賊唔見佢哋咁醒，陷害忠良，砌生豬肉就最耍家。之前警方一度老屈智障人士誤殺，全城嘩然，原來可能只係冰山一角。有立法會議員接獲市民求助，稱被警方誣告強姦，雖然後來證實係無辜，但警方老屈佢詐騙不特止，仲發出死亡威脅，搞到當事人寧願留喺拘留所「避難」，都唔想出番去被便衣報復，問你怕未！
唔怪得大部分受訪者狠批警方濫權胡亂檢控，為求盡快破案而罔顧操守喇。古時候官兵剿匪最興「殺良冒功」，明明自己手軟腳軟唔夠人打，又要搵人頭領賞，咪專門攞老弱婦孺開刀囉。呢嗱，依家嘅香港警察都係一擔擔嘅咋，以「廚房藏刀」為由拘捕師奶仔就得，見到五大三粗嘅人蛇罪犯，唔嚇到掉頭走都算偷笑喇！
警隊最近禮聘英國佬返嚟教儀仗隊步操，惹來各界批評，查實步操操得再靚都只係表面工夫，警隊內部烏煙瘴氣，管理混亂先至係大問題，警方與其整色整水，不如實實際際諗下點樣清理門戶，挽回市民信心好過喇！