「世上只有媽媽好，有媽的孩子像個寶，沒媽的孩子像根草」。係呀，唔係每個小寶寶都有父母呵護o架，有啲一出世就冇咗媽媽，有啲連叫一聲媽媽嘅機會都冇，有啲連媽媽個樣係點都唔知，你話塵世間最悲慘嘅事係咪莫過於此吖？
唉，最近就有兩個小寶寶呱呱墜地就痛失媽媽，仲要兩單都發生喺伊利沙伯醫院。先講今年十月嗰單吖，調查報告日前出爐，揭示醫護人員連環犯錯，先係冇完全清除產婦體內遺留嘅胎盤組織，令子宮無法收縮導致大量出血，出現「彌散性血管內凝血併發症」；之後醫護人員又未察覺產婦分娩後有早期休克徵狀，卒之返魂乏術。另一單發生喺上月底，直情係翻版，又係產婦分娩後無故大量出血，又係出現「彌散性血管內凝血併發症」，儘管緊急切除子宮，最終都係不治。
嗱，院方話就話已就第二單畸士成立調查委員會，仲話會轉交死因庭跟進，兼且承認短時間內出現兩宗產婦死亡個案「並不尋常」，不過如果唔係受害人家屬投訴，引起傳媒關注，睇怕當局至今仍然冚得就冚。再講吖，成立調查委員會唔代表事件會得到公正處理，好似第一單咁吖，院方冇錯係認衰，但呢頭話會檢視指引同埋加強培訓，嗰頭又話醫護人員已經盡力搶救，冇人需要受罰。喂，人命嚟o架，因為醫護人員連番出錯，大好家庭就此散晒，一句盡咗力就關人個關，有冇再冷血啲吖。
真係諗極唔明，生BB又唔係咩奇難雜症，伊院仲係九龍中聯網嘅龍頭醫院添，醫護人員居然水皮成咁，無心裝載成咁，簡直令人心寒。不過又難怪嘅，今時唔同往日，香港醫療水平每況愈下，醫療事故層出不窮，開錯刀有之，輸錯血有之，派錯藥有之，左右不分有之，唔講仲以為去咗第三世界。有人話，一隻腳踏入公院，一隻腳就踏入閻羅殿，真係冇誇張o架。
最老土嘅係，每次爆出醫療事故，當局例牌成立專責小組，例牌提交報告，例牌提出一大堆建議，結果話口未完又重複犯錯。就算上到死因庭，結論十之八九係「死於意外」、「死於不幸」，根本無人需要問責，你話家屬想討回公道係咪難過登天吖？你話受害人點會死得眼閉吖？
講到尾，醫醫相護嘅結果，必然係有恃無恐，變本加厲，醫療事故會斷尾至奇。尤其係前線醫護人手長期不足，十個煲七個蓋，手忙腳亂咯喎，醫療事故只會有增無減，有錢人就話光顧私家醫院啫，窮人根本冇得揀，都咪話唔悲哀。