政府廣告歌都有唱啦，「馬路如虎口，交通規則要遵守，安全第一砵砵命長久」，所以話，任何道路使用者都要打醒十二分精神，千祈咪觸犯交通規例，否則隨時搞出人命嘅咋。
可惜吖，政府冇嘢叻，最叻有口話人冇口話自己。嗱，最近網上瘋傳一張警方內部發出嘅「車速寬減」最新修訂文件，話警方使用雷射槍測速時，全部超速個案一律由以往寬減三公里改為五公里，至於其他偵速儀就仲誇張，會因應不同車速，寬減由三公里至最高八公里不等，仲話新修訂本周日已經生效。警方就話有關指引屬內部行動細節，不宜公開，即係變相承認真有其事喇。
即係咁，過去警方偵速儀器被質疑有誤差，為免口同鼻拗，一律對超速車輛寬減三公里，咁做都可以理解，之但係由三公里進一步放寬至五公里甚至八公里，就真係令人抓晒頭嘞。你話唔係咩，隨着科技愈來愈先進，儀器愈來愈精密，誤差只會愈縮愈小，偏偏警方反其道而行，你話係咪離譜吖。
舉個例吖，若然司機超速十八公里，原有指引下會被視為超速十五公里，罰款及扣三分，換咗新指引後，司機只會被視為超速十三公里，罰款幾舊水咁大把，唔使扣分，仲有咩阻嚇力喎。咁仲唔止，「三腳架」、「隱形戰車」同埋「白鴿籠」影嘅快相，車輛車速愈高，超速愈多，可以獲寬減嘅里數竟然愈多，咁咪即係變相鼓勵飆車行為？
大家有眼見，愈來愈多致命車禍由司機超速引致，好似啟德郵輪碼頭成為飆車熱點，早前先至有司機撞死一個踩單車嘅大學生。警方嗰頭大大聲話嚴打違規司機，呢頭靜雞雞降低超速標準，神又係佢鬼又係佢。正如有人話齋，法例係要嚟遵守嘅，超速一公里都係超速，警方失驚無神「扮好人」，鍾意飆車嘅司機就話拍爛手掌啫，但對於絕大部分道路使用者嚟講根本唔公平，難聽啲講句，同草菅人命差唔多嘅咋。
最令人無法接受嘅係，執法嘅係警方，制訂及改變規則嘅又係警方，即係乜都自己玩晒。咪畀功夫茶批中，警方放寬標準，隨時又係欺善怕惡，討好權貴咋。你知喇，鍾意飆車嘅除咗非法賽車黨，主要係有能力揸名貴跑車嘅有權有勢人士，對佢哋嚟講，超速標準應該寬鬆再寬鬆，咁搞法，下次警方容乜易將標準放寬到十公里甚至廿公里架，咁仲使執法嘅！
都係嗰句嘞，法之不行，自上犯之。當局有法不依，執法不嚴咯喎，社會只會愈來愈亂，民怨只會愈來愈多，同搬石頭砸自己腳冇咩分別嘅咋。