「王小二過年，一年不如一年」大家聽得多，但呢段古就未必人人知。話說乾隆微服私訪杭州，去到貧民王小二家，對方用豆腐燉魚頭招呼，點知正合脾胃。乾隆第二年春節故地重遊，問起近況，王小二坦言「一年不如一年」，結果獲乾隆爺親自打本兼寫埋招牌，從此發過豬頭，生活無憂。
王小二就話守得雲開啫，可憐香港人睇唔到前景，搵唔到出路，都咪話唔徬徨。有團體調查發現，市民對即將過去一年嘅個人生活、身心健康、工作以及學業嘅滿意度均有所下跌，特別係喺個人生活方面，只有四成五人表示滿意，比舊年下跌九個百分點，亦係○五年進行調查以來最低。至於社會整體環境方面，市民對民生狀況及政治環境不滿嘅分別超過六成，而表示滿意嘅就只係剩番一成左右。
鬼咩，回顧整個二○一六年，想搵件開心嘅事都難，成個社會家嘈屋閉，幾乎無日安寧，市民點開心得落吖。自從春節旺角暴亂開始，港獨思潮進一步氾濫成災，由街頭滲透校園，之後再殺入議會，一場宣誓風波，最終逼到中央出手釋法收場，代價由七百萬無辜市民攤分。港府對玩嘢議員嘅司法覆核仍未了局，點知一波未平一波又起，港獨同台獨搞「大串聯」，唔玩死香港誓不罷休。有團體公布本年度香港年度漢字，「亂」字脫穎而出，可謂實至名歸。
冇計喇，有啲人眼中只有政治鬥爭，香港唔亂至奇。好似故宮文物喺西九文化區展出咁吖，因為港府冇依足規矩，授人以柄，反對派就借題發揮，「文化統戰」、「國民教育工具」等大帽子四圍飛，市民想耳根清淨幾日都難！
本來呢，沉默嘅大多數對政治爭拗冇乜興趣，好多人只係想安安心心過小日子，可惜喺冇神經政府嘅管治下，安居樂業只能成為奢望。大家有眼見，本屆政府拉雜成軍，濫竽充數，撞板多過食飯，房屋、教育、安老等施政承諾全面跳票唔在講，連香港一直引以自豪嘅「安全城市」招牌都岌岌可危，警隊內部更加係醜聞頻傳，假難民作奸犯科，爆竊搶劫無日無之，連市民行山都有機會撞正剪徑毛賊，直頭係有得震冇得瞓。
往事不可諫，來者猶可追，新一年港人有冇新希望？上述民調顯示，認為「明年會更好」或「會更差」嘅比例大概一半一半。又難怪嘅，特首宣布放棄連任，市民的確有樂觀嘅理由，但新管治者有冇能力撥亂反正，仲係未知之數，香港正處於十字路口，新一年是喜是憂，惟有拭目以待。