本港旅遊業陷入寒冬早就唔係新聞咯，尋日海洋公園公布上年度業績，錄得二億四千萬元虧損，差過沙士時期。至於迪士尼樂園亦係難兄難弟，搞到要打劫納稅人荷包擴建救亡。鬼咩，內地訪港旅客跌跌不休，旅遊業大半壁江山崩塌，業界唔吊鹽水至奇啦。
講到內地旅客過門不入，都可以話係香港自己攞嚟衰。大家有眼見，近年唔止驅蝗鬧劇不絕如縷，劏客醜聞更係層出不窮，強迫購物唔在講，仲有激死旅客甚至打死旅客添，係人都怕怕啦。所以話啫，港府長期不監不管，放任自流，根本就係自毀長城嘅罪魁禍首。
可能選舉臨近，港府臨急抱佛腳啩，講咗N年要成立嘅旅遊業監管局終於有啲眉目嘞。嗱，當局就《旅遊業條例草案》提出主要立法建議，包括成立旅監局，代替現時旅行代理商註冊處及旅遊業議會嘅發牌及規管工作；又訂明導遊及領隊不得強迫旅客購物，違者最高可被罰款五萬元及監禁一年；另外，旅行社不得與未經國家旅遊局批准嘅「野雞」旅行社合作，又規定新開設旅行社必須繳交五十萬元保證金，新開設及申請續牌嘅旅行社必須委任一名獲授權代表等。至於旅監局成員會以非業界人士為主，避免自己人管自己人喎。
表面睇，今次嘅監管及罰則比之前嚴得多，阻嚇性亦大得多，總算做番啲嘢，但實際上，旅監局只係紙上談兵嘅咋，當局講到明，旅監局最快要兩至三年後先至成立，咁即係點，即係話畀無良業界聽，可以再劏多幾年客冇有怕咯。大家都知，家陣旅遊業已經得番半條人命，而旅議會自己人管自己人，點會出重手吖，咁就難怪違規旅行社被釘牌嘅個案少之又少，就算被釘牌，轉頭又可以借屍還魂繼續劏客，港府唔係盡快撥亂反正，反而一味歎慢板，你話係咪唔得佢死吖！
真係諗極唔明，旅監局由前朝政府提出，至今已經拖拉多年，家陣仲要拖多幾年先至成立，唔通完成一條法例仲複雜過上太空登月嘅？大型基建一拖再拖就話有得賴地硬啫，成立一個旅監局又有乜嘢好賴呢？講到尾，港府弱勢無能，連擺平業界利益都阻力重重，但又要扮到適度有為咁款，咪惟有採取拖字訣囉。
冇計嘞，港府冇嘢叻，最叻吹水唔抹嘴。咪話功夫茶唔提醒，十月份訪港旅客按年下跌百分之二點四，已經連跌三個月，全年埋單計數肯定唔樂觀，加上經濟大環境情況不妙，四大支柱行業危危乎，港府繼續唔嗲唔吊，旅遊業想唔玩完都幾難。