一年容易又聖誕。相傳喺第一次世界大戰期間，交戰嘅英德雙方士兵平安夜當晚暫時放低手中武器，跟手仲踢咗場友誼波，自此之後，「聖誕停戰日」作為傳統就不斷延續落去嘞。
可惜吖，人心不古，今個聖誕世界並不太平，德國柏林一個聖誕市集日前有巨型貨車高速撞向人群，造成多人死傷，澳洲警亦粉碎咗一場針對墨爾本嘅連環恐襲陰謀，相對於世界各地風聲鶴唳，香港算係一塊樂土咯。大家睇吓機場，出外散心嘅旅客人頭湧湧；雖然零售業界普遍唔睇好今年市道，但條街依然逼滿留港慶祝嘅人群，食肆商場水洩不通，都總算叫做有番啲節日氣氛。
不過商家睇怕都係得呢幾日可以開心吓，事關內地旅客來港持續縮水，本港零售同服務業早就進入冰河期，市區吉舖愈來愈多，呢幾日嘅暢旺只係虛火嚟咋，「一節淡三墟」，嚟緊一段時間先至難捱。仲有吖，早排有機構調查發現，今年打工仔平均加薪幅度只為百分之四，預計出年只會更差，平均加幅介乎百分之三點五至三點八，通脹都未必追得贏，打工仔自然留多兩個錢傍身，消費市道想暢旺都幾難。
經濟前景混沌不明仲係其次，政治低氣壓令人窒息先至難頂，連聖公會大主教鄺保羅都睇唔過眼，喺聖誕文告裏面狠批近年社會上出現嘅港獨思潮以及立法會宣誓風波，鼓吹分裂同排外，表面上係政治取向分歧，實際上反映社會價值觀分裂以及人倫關係嘅扭曲；天主教香港教區樞機湯漢亦不約而同慨嘆，過去一年香港社會經歷唔同程度嘅矛盾和傷痛，大家早已疲倦不堪，希望各方可以趁聖誕停落嚟安靜一下，彼此增進溝通咁話。
唉，樹欲靜而風不止，宗教領袖無論幾咁苦口婆心，都係對牛彈琴嘅啫。大家有眼見，經歷一場佔領之亂，香港社會嚴重撕裂，家庭失和，朋友反目，愈來愈多人不問是非，只問立場，甚至以為自己真理在手，就可以目空一切，想點就點。係人都知，搞港獨不切實際，最終只會累死香港，有啲人硬係唯恐天下不亂，硬係要一錯再錯，結果連累無辜市民一齊埋單，簡直冤過竇娥。
冇計喇，蒼蠅不叮無縫的蛋，怪只怪冇靈魂政府施政一塌糊塗，授人以柄，教育、安老、房屋、醫療、治安冇瓣掂，無良政客唔乘機搞事至奇喇！
始終都係呢句︰今朝有酒今朝醉，明日愁來明日愁，大家趁呢幾日悠長假期，有得食好食，有得玩好玩，歌仔都有得唱︰「又到聖誕，又到聖誕，下個聖誕有冇今年咁歎」，真係冇人話得埋㗎！