中國人最痛恨漢奸，同時中國又盛產漢奸，點解會咁？睇吓人稱「漢奸黎」嘅壹傳媒老闆黎智英就知嘞，佢老哥反中亂港非但唔會受懲罰，反而受到法律嘅保護，反觀民間義士只係聲討幾句已經要拉要鎖咁滯。賣國求榮有運行，愛國愛港無前途，你話呢個係乜嘢世界吖！
即係咁，針對漢奸黎嘅示威行動一浪接一浪，民間人士風雨不改，日日喺黎宅門外恭候大駕，搞到佢老哥出入都要運後門走，好不狼狽。咪睇肥佬平時扮晒「民主教父」，開口埋口「言論自由」、「集會自由」，畀人趷得兩趷，當堂反轉豬肚，兇相畢露，佢日前向法庭申請禁制令，禁止任何人喺佢屋企外示威及騷擾，違者可被視作藐視法庭，分分鐘監都有得坐！
漢奸黎本來以為一紙禁制令就可以擋住民意怒潮，結果證明係太傻太天真。世上沒有無緣無故嘅恨，市民之所以不惜以身犯險，皆因漢奸罪孽實在太深重，有佢喺度一日，香港想唔亂都幾難。漢奸黎旗下淫媒老作新聞、宣淫販賤、鼓吹非法佔中唔在講，頻頻「播獨」更加將香港推向萬劫不復之地，話佢係香江第一罪人，相信冇人會反對。
呢嗱，話口未完又嚟喇，港府日前申請司法覆核，要求取消四名宣誓加料反對派議員嘅資格，漢奸黎急call外號「李漢奸」嘅白鴿黨創黨主席李柱銘以及一眾老鴿乳鴿返屋企，合謀於暗室，肯定冇好嘢。係人都知，漢奸黎身為反對派「金主」，家陣立法會形勢有變，又係時候諗吓點樣喺補選操控戰局。話漢奸黎唔係「漢奸總舵主」、「港獨總司令」，三歲細路都唔信。
講番嗰班鍥而不捨嘅反黎義士，佢哋嘅義舉係就係令人敬佩，問題係漢奸黎連國家民族都可以出賣，面皮厚過恐龍皮，又點會良心發現、放下屠刀吖。早排有三位市民向漢奸黎掟豬內臟，到頭來漢奸毛都冇少一條，三位義士反而要洗定八月十五，咁嘅犧牲你話幾無謂嘞。
講到尾，正因為港府有法不依，姑息養奸，民間義士至焗住出頭。大家有眼見，漢奸黎捲入嘅黑金案，查來查去都係得個吉；至於佢被指幕後策劃佔領之亂，當局一開頭「預約拘捕」，係威係勢，點知拖拖吓又係冇晒下文，漢奸黎爆響口話「唔怕坐監，只怕洗廁所」，咪就係睇死港府投鼠忌器，唔敢郁佢囉。
古人就講得啱嘞，「國家設立法制，原以禁暴止奸，安全良善」，今時今日香港啱啱掉轉，對奸邪呵護備至，對良善百般打壓，所謂法治社會，只係得啖笑！