「雪上加霜」呢句成語大家聽得多，大批港客趁住聖誕長假，諗住去北海道浸溫泉散心，點知遇正當地五十年來最強暴風雪，滯留機場淪為難民，個心已經涼咗半截，部分人唔好彩幫襯國泰航空，畀人玩到陀陀擰，就更加係啞子吃黃連，有苦自己知，心情名副其實雪上加霜。
唔係誇張㗎，家陣成二千多名旅客逼爆機場，部分人由廿二號滯留至今，候機室十足十打完仗咁，垃圾桶堆滿垃圾，衞生環境惡劣，食水同食物亦嚴重不足，有小朋友等到唔舒服多次嘔吐，家長怕離開機場睇醫生誤咗歸期，惟有淨係畀水小朋友飲；亦有旅客誤咗歸期，陪唔到懷孕七月嘅太太，真係要幾混亂有幾混亂，要幾狼狽有幾狼狽。
屋漏偏逢連夜雨，船遲又遇當頭風，旅客半天吊已經夠徬徨無助喇，國泰航空善後安排立立亂，更加猶如喺傷口上灑鹽。好似另一間規模較細嘅航空公司咁，每隔一段時間派出機組人員通知乘客最新登機安排，反觀國泰求其派工作人員同乘客道歉後就算，乜嘢資料都冇提供。最離譜嘅係，其他航空公司向旅客提供一千二百港元作賠償，國泰畀人嘈多兩嘈，至死死地氣派二千日圓，即係大概百幾蚊港紙咁大把，難怪包括受影響嘅演藝名人炮轟國泰當乘客係乞兒，仲反問國泰係咪畀番四千日圓佢哋，就可以攞番個機位呢？
喂，國泰收錢時眉開眼笑，等到出事想搵佢哋就影都唔見，關人個關，仲有冇再離譜啲吖。冇錯，天有不測之風雲，呢啲不可抗力嘅變故，大家可以理解，但唔該補鑊都補得有誠意少少吖。唔怕唔識貨，最怕貨比貨，國泰除咗喺賠償問題上敷衍乘客，有旅客反映其他航空公司已經有班機飛走，唯獨國泰仲係遙遙無期，乘客望天打卦，呢筆數又點計先？
國泰店大欺客都算嘞，仲要欺軟怕硬玩大細超。同樣係受影響旅客，有人獲一晚酒店住宿安排，有啲人就冇；有一家五口由香港飛北海道，結果慘被國泰老點，一時話有機，一時話取消，大拿拿八萬銀旅費隨時泡湯，問你怕未！
話時話，國泰對旅客玩歧視，早就有口皆悲，試過有飛意大利航班臨門delay，點知外籍旅客有免費酒店住，港客只獲免費的士往返機場，後來見眾怒難犯先至一視同仁咋。
國泰醜聞多過食飯，功夫茶早就鬧到口水都乾。喺度淨係想奉勸佢哋一句︰死了張屠夫，不吃混毛豬，市面仲有好多航空公司，旅客冇必要貼錢買難受，國泰繼續不思進取，遲早自食苦果嘅咋！