唔做差人做賊人 神鬼如何兩不分

話口未完又嚟嘞。一名前警員多年前因為撞車「頂包」被勒令提早退休，期間犯有多次案底，早前又夥同其他人爆竊食肆，結果斷正收場，尋日被判入獄二十個月，連個官都忍唔住質問︰「係咪唔做差人就要做壞人呢？」

法官大人可能有所不知，其實「做差人」同「做壞人」之間並無矛盾。又係啱啱撞咗剛剛，廉記落案叉廚兩名警員，指佢哋涉嫌索賄洩漏謀殺案機密。仲有呀，唔知係咪聽咗財爺鬍鬚曾話事偈，一個人好難話一心只做一件事情，好多差大哥一邊捉賊一邊做色狼，唔係性騷擾女下屬就係非禮強姦報案人，實行工作淫樂兩不誤。至於監守自盜、為黑幫通風報信、包庇南亞人蛇犯罪集團等，更加係鑊鑊新鮮鑊鑊甘。

所以話啫，當年車公靈籤批示，「何為邪鬼何為神，神鬼如何兩不分」，用嚟形容今時今日香港警隊，最適合不過，唔好睇有啲人着住制服，好似好英明神武咁款，查實除咗衫之後到底係好人抑或壞人，真係話唔埋。大家有眼見，有警司級人馬被指同黑幫高層圍威喂撈世界，甚至捲入澳門盜竊巨款及串謀訛騙案；更多高層一早諗定退休後泊住大碼頭搵真銀，在職期間點可能公正無私吖。成個警隊上樑不正下樑歪，唔七國咁亂至奇，仲話除暴安良喎，唔再出徐步高一類嘅「魔警」已經還得神落喇！

冇計喇，百年養不足，一日毀有餘。當年警隊包娼庇賭，貪污盛行，電影《七十二家房客》裏面嗰個警察「三六九」角色終日蝦蝦霸霸，借頭借路敲詐良民，形象深入民心，難怪嗰陣時警隊有「有牌爛仔」之稱，「好仔唔當差」更成為唔少老一輩嘅教仔經，之後足足花咗幾十年改善形象，最終至贏得「世界第一流警隊」嘅美譽。可惜吖，明明係同一個警隊，回歸後醜聞多過食飯，金漆招牌到依家已經剝落得七七八八，證明面係人哋畀，架係自己丟，警察形象不斷插水，民望喺紀律部隊包尾大幡，講嚟講去都係自己唔爭氣，與人無尤。

正所謂，紀綱一廢，何事不生。警隊管理混亂，十足十無掩雞籠咁，正正係港府冇神經，禮崩樂壞嘅縮影，香港日日家嘈屋閉，雞犬不寧，家陣知點解喇。