早排港府高官提到香港有「三座大山」，包括港鐵、領展同埋強積金，仲言之鑿鑿話會着手「移山」添，到底係貪口爽定係講得出做得到，大家心中有數，但領展作為其中一座民怨大山，為咗搵錢無所不用其極，市民忍無可忍就肯定珍珠都冇咁真。
講起領展唯利是圖嘅衰嘢，真係一匹布咁長，數到天光都數唔晒。最常用嘅招數離不開瘋狂加租，引入連鎖商店，迫走小商戶；再唔係就將旗下商場、街市及停車場外判甚至出售，淪為炒家樂園，一句講晒即係大石壓死蟹，小商戶同埋居民根本冇say。呢，前排青衣長發街市外判搞出罷市風波，近排出售商場迫遷商戶又引發抗議，咪就係領展作嘅孽囉。
嗱，有監察團體調查領展轄下部分商場及街市，又發現問題嘞。十二個領展商場及街市都出現空置情況，商場平均空置率達一成一，都咪話唔誇張。重災區係觀塘順安商場，空置率近三成；其次係沙田新田圍及荃灣石圍角商場，空置率分別有兩成四及一成八。至於街市就衰多兩錢重，平均空置率高達三成，當中以荃灣石圍角街市最得人驚，空置率達到七成；排第二嘅葵涌安蔭街市空置率亦高達五成，隨時行步路都聽到回音吖。
明明話香港地寸金尺土，公屋商場同街市竟然人去檔空，到底因乜解究呢？位置偏遠固然係原因，但更大問題應該係領展發錢寒，家陣市道不景氣仲瘋狂加租，小商戶頂唔順咪執笠大吉囉。人去檔空梗係人流稀疏o架啦，惡性循環嘅結果係領展採取放棄態度，唔理居民利益。好似空置率最高嘅順安商場咁吖，二十九個舖位有八個空置，唔少仲係一個租戶租用多個舖位，居民有商場等於冇商場，何來港府口中提升屋邨設施、改善生活質素呢？寧願丟空養蚊都唔減租，睇怕天下間只有領展至會咁做生意咯。
即係咁，領展作為上市公司，追求最大利潤本來無可厚非，問題係，領展旗下商場、街市及停車場大多位於公共屋邨，屬於基層社區設施，除咗商業考慮，唔通真係唔使講吓社會責任嘅咩？有政黨做過調查，多達七成市民直指領展畀人「賺到盡」同埋「霸權」嘅印象，就知道領展見利忘義，已經到咗民怨沸騰嘅地步。
講到尾，領展呢隻「吸血狂魔」咪就係港府一手養成嘅囉。當局一味以自由市場做擋箭牌，對領展巧取豪奪不聞不問，終於搞到今日尾大不掉。最弊嘅係，港府講就天下無敵，做就無能為力，對領展問題束手無策，旨意港府呢個愚公移走民怨大山喎，發夢冇咁早喇。