青山巍巍埋忠骨，白雲依依映後人。喺牛頭角迷你倉大火中殉職嘅兩位救火英雄雖然長眠浩園，但佢哋嘅英勇事迹，市民永遠唔會忘記。不過咁，淨係市民有記性都係唔夠，官老爺唔識吸取教訓，好了傷疤忘了疼，分分鐘重演悲劇嘅咋！
呢，意外發生後消防處及相關部門急急補鑊，巡查全港迷你倉，保安局局長黎棟國尋日話喎，喺逾百次調查中發現唔少迷你倉違反現行消防條例，處方已發出數十張消除火警危險通知書，又話當局嚟緊一段時間會先巡查未安裝自動灑水系統嘅迷你倉，估計類似舊式工廈全港有八十幾幢之多。
講真，工廈消防安全漏洞百出，已經唔係今時今日嘅事。港府推出活化工廈政策後闊佬懶理，對違規改建亂象放任自流，於是乎，開骨灰龕場者有之，開補習社有之，間劏房出租牟利嘅更加不計其數，特別係工廈劏房，亂鋪電線、加厚地台乜都齊，簡直亂過亂世佳人；又好似今次出事嘅牛頭角迷你倉咁吖，至少涉及逃生通道不合規格等八宗罪，全港究竟仲有幾多類似工廈，真係冇人話得埋。港產官僚唔死人冧樓都唔做嘢，你話係咪靠害吖！
當然，遲到好過冇到，官老爺肯補鑊，點都好過翹埋雙手乜都唔做，怕只怕家陣群情洶湧，當局喺壓力下冇法子唔做番場大龍鳳，等到風頭一過又打回原形，所謂大巡查到頭來淪為敷衍民意嘅公關騷。有辦你睇，港府話取締僭建物夠講咗N咁多年喇，結果係點？屋宇署發出清拆令後拍拍籮柚，關人個關，唔少業主當耳邊風，有個案甚至一拖拖足三十年，真係唔到你唔服。
話時話，香港地都市炸彈處處，除咗工廈迷你倉同埋僭建物，劏房，舊樓、危樹甚至升降機，全部都可以成為大殺傷力武器，頭痛醫頭，掛一漏萬，始終無補於事。講到底，要防止悲劇重演，最緊要都係官老爺有法必依、執法必嚴。
講到執法必嚴，有樣嘢不得不提。工廈危機之所以長爆長有，主要係現行消防條例千瘡百孔，同時代嚴重脫節，《消防（修訂）條例草案》原定早前在立法會通過，點知最後喺政客瘋狂拉布下胎死腹中，黎局長希望新一屆立法會重推草案，睇怕都係緣木求魚，不如疊埋心水做好自己份工好過。
所以話，政府無能固然累事，政客無良更加誤盡蒼生。計功夫茶話齋，立法會候選人除咗簽確認書承諾唔會提倡港獨，仲應該承諾唔會拉布阻撓民生議題，否則點對得住消防英雄泉下之靈吖！