日劇《白色巨塔》講述日本醫療界山頭林立，醫生為咗維護小圈子利益，無所不用其極，令人嘆為觀止，其實喺呢方面，香港一樣不遑多讓嘅咋！
話說立法會日前二讀醫生註冊條例修訂草案，當中建議喺醫委會增加四名非業內委員，結果引發醫生團體靜坐示威，加上會場內來自醫學界嘅立法會議員拉布點人數，最終流會收場。港府尋日向立法會秘書處發信，下周三大會將繼續辯論相關草案，高官更加放定風，叫反對派唔使旨意政府撤回草案。政府業界各不相讓，而今屆會期又已進入倒數階段，睇怕都係拉倒居多。
講真，公立醫院醫療事故層出不窮，無奇不有，唔知幾多人踏入枉死城，弊在醫委會處理投訴慢如蝸牛，而且次次高高舉起，輕輕放下，被指「醫醫相護」一啲唔出奇。所以咯喎，要求改革醫委會嘅呼聲強烈，今次港府推出改革方案正正係迫於民意，而平時最鍾意拉布、專門搞事嘅議員亦唔敢與民為敵。唔知係咪知道眾怒難犯，醫生組織強調尊重病人權益，之所以反對修例，係因為擔心CY通過委任新委員操控醫委會，影響業界自主，又話改革係為咗日後引入內地醫生鋪路喎。
呢嗱嗱嗱，呢啲咪就係民生議題政治化咯。CY不受歡迎，中港矛盾愈演愈烈，簡直係最就手嘅稻草人，杏林精英懸壺濟世，估唔到原來玩政治都咁叻，呢一招四両撥千斤，轉移視線，真係唔到你唔服。可惜吖，市民眼睛雪亮，按現時醫委會組成比例，即使業外人士增加一倍，依然只佔少數，根本改變唔到醫生專業自主嘅格局。再講吖，新增委員由病人關注組織選舉產生，特首委任只係行禮如儀，唔通只有醫生先至有「自主性」，病人組織就係扯線公仔？
至於擔心引入內地醫生咯喎，似乎亦講唔過去。係人都知，本港醫界門檻極高，淨係專業資格考試一關已經難過登天，連西方發達社會嘅醫生都望而生畏，內地醫生嚟香港搵食更加不可想像。不過點講都好，無論係一個社會抑或一個行業，有競爭先有進步，故步自封注定冇運行。馬尼拉槍擊案受害者易小玲喺本港醫院接受三十幾次整形手術未能解決問題，反而到台灣求醫一take搞掂，已經勝過千言萬語。
正所謂，專業自主誠可貴，病人權益價更高。藝人張崇德兒子不幸夭折，前後花費九年、耗盡家財先至取回公道，佢話醫界關注佢哋嘅專業同工作，其實最應該關注嘅係人嘅生命，呢番肺腑之言，杏林精英收到未？