港府提出改革醫委會，增加非業內委員數目，醫學界嘈到拆天，群起反對，據講係擔心當局為咗引入內地醫生鋪路，本港醫療水平會被拉低喎。講真，公院醫療事故長爆長有，本身水平係點，仲使唔使人哋拉低，大家心照喇！
呢嗱，話口未完又嚟喇，今次受害嘅仲係五歲女童添！話說呢位病人舊年十一月突然喺街暈倒，被送去威爾斯親王醫院治療，院方初時診斷係貧血及脾臟腫大，強調無生命危險，點知到咗今年三月，女童喺屋企吐出血塊及屙血，院方居然話女童只係腸胃炎整損食道而出血，結果兩星期後女童又再暈倒送院，最終搶救無效離世。
小朋友乜都未經歷過，就咁踏入枉死城，家屬唔傷心就假，佢哋怒轟女童身體狀況有異，早就有迹可尋，院方一直檢查唔出病因，質疑醫護人員斷症馬虎。正如有醫學界人士話齋，病人吐血可能係嚴重疾病徵兆，後果可大可小，點可以掉以輕心o架！
冇計喇，公院醫療事故鑊鑊新鮮鑊鑊甘，唔係打錯針就係輸錯血，淨係最近一個月，東區醫院同明愛醫院就分別爆出「爆肺」老翁手術後體內遺留刀片，以及老婦懷疑服用薄血藥後內出血死亡事故。唔怪得有人話，病人去公院求診，等於半隻腳踏入鬼門關喇。
病人枉送性命，家屬唯一可以做嘅就係討回公道，可惜吖，醫委會處理投訴慢如蝸牛，而且往往高高舉起，輕輕放下，病人想討回公道仲難過秋菊打官司，正因為醫生被指「醫醫相衞」，搞到怨聲載道，港府喺巨大民意壓力下提出改革醫委會，增加非業內委員數目。其實明眼人都睇得出，家陣啲「外援」絕大多數來自英聯邦國家而非內地，醫學界係都要以輸入內地醫生為藉口，分明係知道今時今日中港矛盾嚴重，挑起市民對政府嘅不信任啫。
講開又講，公院醫生周不時投訴資源不足，十個煲得七個蓋，引入更多「外援」幫輕下，照計應該無任歡迎至係。有學者就講得啱嘞，本港醫生增加速度追唔上人口老化，醫生同病人比例莫講話追唔上英、美，連南韓、新加坡等鄰近國家都不如。特別係新加坡，設立外國醫學院認可名單，名單上醫生只要經過一至四年實習就可以喺當地行醫，大大紓緩人手壓力，點解香港唔學下呢？
一句講晒，唔理黑貓白貓，捉到老鼠就係好貓。今次醫委會改革建議，病人受益之餘，醫界亦可以洗刷「醫醫相衞」、保護主義嘅印象，一家便宜兩家着，何樂而不為。