為求破案，唔理好醜，但求就手，砌生豬肉陷害無辜……咪以為呢啲係內地公安專利，開口埋口「服務為本，精益求精」嘅香港警隊都係一擔擔，甚至連冇自辯能力嘅智障人士都唔放過，簡直離晒大譜！
大家應該記得，早前大圍發生老翁遛狗被毆斃案，當時警方火速拘捕一名智障男子並控以誤殺罪，點知原來係拉錯人，辦錯案。事主家屬其後向監警會投訴，經調查後證實涉事九名警員疏忽職守、濫用職權等指控屬實，部分人需要接受紀律覆檢。
最過分嘅係，負責調查嘅警員明知事主有不在場證據，但仍高調召開記者會公布「戰果」，甚至堅持拘留四十八小時，期間既冇為事主提供醫療護理，又喺錄影會面時發問引導性問題誘供。咪畀人睇死，慌唔係有人睇中事主「有口難辯」，問乜都照單全收，咁咪可以閃電破案close file囉。
冇錯，出咗人命大案，警方承受好大輿論壓力，但點都唔可以成為亂屈市民嘅藉口。古人處決死囚前都識驗明正身，點似得香港警察拉人咁求求其其，是是但但o架。今次受害人有家屬幫手據理力爭已經算好彩，如果唔係，依家可能仲唱緊《黑獄斷腸歌》吖！
一葉落知天下秋，近年警隊內部醜聞多多，亂象叢生，今次拉錯人砌生豬肉，只係冰山一角咋。大家有眼睇，黑幫製運毒品數十年如一日，以前好似天下太平，最近卻接連破獲大案，呢一切發生喺警方換咗高層之後，到底係乜嘢原因，畫公仔唔使畫出腸喇啩，咁啱得咁蹺，上個月廉署拘捕一名警長，懷疑佢向黑幫提供警方反黑情報達數年之久。仲有，人蛇源源而至，南亞兵團無惡不作，元朗等地淪為重災區，幕後黑手至今仍然逍遙法外，有人質疑「警黑一家親」，唔係冇道理(口架)。
冇計喇，警隊高層退休後一個二個顧住搵真銀，唔係泊住商界大碼頭就係幫賭場做嘢，再唔係就同黑社會大佬同撈同煲，大嘅做壞個頭，班細嘅亦唔會好得去邊，監守自盜，涉風化案……直頭沒有最醜，只有更醜。大年初一旺角暴動，暴徒用磚頭與石頭招呼警方，居然有唔少人拍掌叫好，警隊不得人心，形象插水，可見一斑。有果必有因，警隊近年畀人扣「黑警」帽子，除咗怨有心人挑撥抹黑，自己都好應該好好反省吓。
都係古人講得啱︰百年養不足，一日毀有餘。警隊幾十年來辛苦建立嘅專業形象，老本已經所餘無幾，繼續不思進取，自甘墮落，唔使幾耐又會變番「有牌爛仔」嘅喇！