古人話六月飛霜，係上天對人間不平事嘅憤慨。尋日牛頭角迷你倉火災殉職消防隊目許志傑舉行路祭，雖然無六月飛霜，但突然落起大雨，天人同哭，可以話，呢陣過雲雨唔止係對火災慘劇嘅悲痛，更加係上天對港府草菅人命嘅控訴。
唔係咩？港府活化舊工廠大廈，容許迷你倉等非污染工業進駐，但消防條例就未有與時俱進，工廈唔裝消防自動灑水系統都可以過到關，你話係咪禍根早種吖，出事只爭遲早嘅咋。冇針對性規管唔在講，當局平時又懶懶閒，對迷你倉放任自流，雜物堆到天花板又得，儲藏油漆、氣罐、風煤樽等易燃易爆品又得，通道出口堆放垃圾都仲得，結果一出事咪釀成奇災巨禍囉。所以話啫，呢場史上之最嘅長命火唔係天災，而係人禍，有人質疑兩名消防英雄係枉送性命，唔係冇道理o架。
迷你倉亂象燒出民怨之火，港府梗係聞到燶味喇。消防處、屋宇署、地政總署同勞工處尋日正式展開跨部門巡查大行動，涉及全港四百多個迷你倉，二百五十九幢工廈。當局話喎，先巡查冇自動灑水系統嘅八十幾棟工廈，再巡其他工廈，兩個月內完成所有巡查工作，又話巡查期間如有發現違規情況，會採取執法行動，並為工作人員提供防火訓練咁話。
嗱，呢啲咪就係唔死人冧樓唔做嘢囉，咪就係賊過興兵囉。不過點講都好，有補鑊始終好過冇補鑊，最令人擔心嘅係，官僚施政當做騷，連補鑊都敷衍塞責。你知喇，次次爆出施政甩轆醜聞，港府都信誓旦旦加強監管，做一場大龍鳳畀大家睇，風頭一過就不了了之，故態依舊，隱患依然，直至下一次又爆大鑊嘢。
官僚靠得住，豬乸會上樹，講得冇錯o架。之不過咁，世事冇絕對，要徹底消除迷你倉消防隱患，唔係完全冇辦法嘅。舉個例子吖，內地早年大型礦井災難不斷，近年已經明顯減少，點解會咁？原因係最高層下令，礦井領導必須身先士卒，「帶班下井」，每日同礦工一齊落井底下面工作。以前嘅官唔使落井，肯定不負責任，家陣要以身作則，仲唔認真搞好礦井安全咩。
天下烏鴉一般黑，香港迷你倉亂象叢生，道理一樣嘅咋。喺目前嘅情況下，安全隱患點多都好，火災幾嚴重又好，受害嘅永遠唔係班官，佢哋梗係唔嗲唔吊，關人個關喇。嗱，如果規定相關部門嘅官僚以後要陪同消防員一齊入火場救火，一樣有機會做救火英雄，功夫茶敢寫包單，全部消防隱患肯定一夜之間消失晒吖！