細個讀幼稚園，功課企理，儀容整潔，老師會喺手冊扱一個白兔仔印以示獎勵，相反，功課烏哩單刀，手甲綑晒黑邊，咁黑豬仔印一定走唔甩。賞優罰劣，道理一字咁淺，管三歲細路嘅幼稚園老師識，管七百萬市民嘅港產官僚反而唔識，簡直吹脹！
話咁快又到七一，除咗例牌示威遊行，禮賓府又上演每年一度嘅授勳派餅仔鬧劇。睇吓份名單，真正實至名歸嘅，一隻手掌數得晒，反而唔少得主醜聞纏身，好似最高殊榮嘅大紫荊勳章得主之一、民建聯立法會議員譚耀宗咁吖，係就係夠老資格，問題係佢老哥啱啱先捲入「特息特割」風波，呢個時候頒個大紫荊畀佢，到底係咪合適，相信唔使多講喇啩。
大紫荊得主爭議多多，次一級嘅金紫荊星章亦唔好得幾多，同「高官自己友俱樂部」冇乜分別。九名得主裏面，環境局局長黃錦星、發展局局長陳茂波以及前公務員事務局局長鄧國威榜上有名。本港環保毫無寸進，阿星局長撞板多過食飯，居然無功受祿，已經夠搞笑(口架)喇；陳茂波有名你叫「劏房波」，官聲本來就有口皆悲，加上拓土建屋不力，房屋問題愈演愈烈，劏房波更加係難辭其咎，家陣堂而皇之受勳，等於喺無殼蝸牛嘅傷口上灑鹽嘅咋。
至於鄧國威受勳就更加騎呢，當日佢突然被港府撤換，話就話因為「家庭原因」，但係人都知其實係被炒魷魚。唔怪得有人話，今次好明顯係一啖沙糖一啖屎，請食無情雞在前，頒贈金水蓋在後，叫做攞番個安慰獎喇。
照咁睇，授勳已經唔止係政治酬庸咁簡單，直頭變咗政治「安家費」，結果咪好似太公分豬肉──人人有份囉。港英殖民地年代，攞得荷蘭水蓋嘅，就算唔係德高望重都係社會賢達，點知回歸後係又派唔係又派，好又派醜又派，濫發程度分分鐘拍得住當年國民政府嘅金圓券，公信力全無之餘，亦一啲都唔馨香。
鬼咩，嗰班所謂「勳賢」，魚龍混雜，泥沙俱下，有幾個係真材實料(口架)，連臭名遠播、人稱「廢嶽」嘅前食衞局局長周一嶽都有份受勳，試問仲有乜嘢阿貓阿狗唔夠資格。呢，試過有內地國企負責人呢頭獲港府委任為太平紳士，嗰頭就因為涉嫌違紀而被內地免職調查，簡直笑大人個口。
都係古人講得啱︰「唯名與器，不可假人。」港府濫發荷蘭水蓋，搞到周街都係勳賢紳士，「白兔仔」同「黑豬仔」不分，賞罰不明，是非顛倒，香港亂象叢生，無奇不有，由此可見一斑！