二千元一份《東方日報》？大家冇睇錯，的確係四張大牛，不過盡可以放心，並唔係報紙瘋狂加價，而係愛心讀者為善最樂，用二千元買一份報紙，為旺角遇劫老報販「睡婆婆」送暖解困啫。
正所謂，施比受更有福，有能力幫人絕對係一件開心事，善長仁翁紛紛向「睡婆婆」伸出援手，證明《東方日報》讀者有素質有愛心，幫人永冇托手(月爭)。話時話，「睡婆婆」被冷血南亞賊當街搶去血汗錢，仲搞到頭破血流，有良知嘅人都冇可能置身事外，連日來探望婆婆嘅市民絡繹不絕，噓寒問暖，送錢送物資，搞到報檔變咗小食店咁款，證明人間有愛，令人感動。
好喇，市民愛心爆棚，對非親非故嘅婆婆愛護有加，真正做到老吾老以及人之老，咁身為父母官嘅港產官僚又做過乜嘢呢？講起嚟就慚愧咯，案發多日都冇政府部門理會過婆婆，直至輿論鬧爆，先至有社署職員嚟探望，擺明做騷喇。至於警方就仲差勁，至今依然破唔到案，拉唔到人，搞到婆婆見過鬼怕黑，每次見到南亞裔人士行過，個心都會離一離、怯一怯。你話嘞，當局對假難民亂象放任自流，係咪助紂為虐吖？係咪殘忍冷血吖？
可能畀人鬧得多，警方終於知衰啩，尋日聲稱已鎖定一名非華裔男子為疑兇，將會全力緝捕歸案喎。咁就講多無謂，行動最實際，警方一直被指包庇假難民，如果唔盡快破幾單大案，點洗脫污名吖。
即係咁，假難民犯罪無日無之，手段兇殘，直情人神共憤，唔止全城鬧爆冇神經政府姑息養奸，不齒警方見到南亞兵團龜縮，就連內地官媒都睇唔過眼，直指「睡婆婆」事件引發全城高度關注，市民除咗同情婆婆遭遇，最擔心嘅係社會治安隨着假難民大軍壓境而不斷惡化。咁即係點？即係事件已經引起中央部門重視，要求港府查找不足囉。
人同此心，心同此理，連一向撐港府嘅中央都表示不滿，證明問題已經惡化到唔能夠唔正視嘅地步。真係諗極唔明，港府對全民退保諸多搪塞，對扶貧紓困諸多設限，對增加醫療資源大耍太極，偏偏對假難民大發慈悲，「寧贈人蛇，不予家人」唔在講，仲要對南亞兵團作奸犯科隻眼開隻眼閉，搞到香港人人自危，有冇再離譜啲吖？
大家一定記得，當年中央一句「查找不足」，董伯伯卒之要腳痛下台，如果港府繼續無知無覺，養癰遺患，後果係點你哋明o架嘞。港府對市民嘅呼聲就話唔嗲唔吊啫，家陣中央已經開咗口，今次點都要做吓嘢喇啩！