成日話香港人愛心爆棚，一啲冇講錯。好似老報販「睡婆婆」咁吖，日前被無良南亞匪搶劫兼受傷，市民紛紛表達關心，唔止送錢送水送食物，仲有街坊主動幫婆婆安裝天眼，真係令人感動！
一方有難，八方支援，固然反映香港市民嘅高質素，但背後嘅故事都幾令人無奈。試諗下，如果唔係南亞兵團姦淫擄掠，無惡不作，睡婆婆又點會遭受無妄之災？假難民源源不絕湧港，除咗打黑工，部分更被黑社會僱用，開片、睇場、販毒、貼街招勒索等樣樣齊，家陣居然連手無寸鐵嘅老婦都唔放過，唔激起天怒人怨至奇。正如「東方報業民意調查」顯示，絕大部分受訪者擔心南亞匪愈來愈猖獗，今次案件只係冰山一角，民怨之大可見一斑。
更可惡嘅係，假難民及南亞兵團喺香港神憎鬼厭，有如過街老鼠，偏偏仲有逐臭之夫幫佢哋講說話，反咬揭發假難民亂象嘅第四權「抹黑」同「種族歧視」，仲形容南亞兵團係「弱勢群體」添。事實勝於雄辯，班假難民喪心病狂，幾狼都有，除咗打劫睡婆婆，之前又試過襲擊老伯同埋學生哥，佢哋到底係「弱勢群體」抑或「專恰弱勢嘅群體」，唔使多講喇啩！
話時話，部分政客為虎作倀，令人側目，冇心冇肺冇神經嘅政府一樣咁冷血。呢，睡婆婆遇劫，官老爺開頭不聞不問，案發至今超過一個禮拜，警方仲未拉到人，唔係無能冷血又係乜嘢呀！有藝人日前自掏腰包緝兇，就係擺明信唔過警方嘞。正如有人話齋，警方連複雜得多嘅兇殺案、毒品案都可以偵破，點解遇到涉及南亞兵團嘅罪案，即刻老鼠拉龜束手無策？本地黑幫被指操控組織南亞犯罪大軍來港，雖然幕後黑手早就呼之欲出，至今仍然逍遙法外，又點怪得市民質疑「警黑一家親」？
講到底，蒼蠅不叮無縫的蛋，正如大部分受訪者直指港府假仁假義係假難民湧港嘅誘因，狠批高官效婦人之仁，助紂為虐。大家有眼見，十八個區議會有一半開會討論假難民問題，要求香港退出聯合國《禁止酷刑公約》及重設禁閉營嘅呼聲更加一浪高過一浪，弊在港府好似借咗聾耳陳隻耳咁，照舊闊佬懶理，地區人士形容港府「包庇」假難民，真係一啲都冇誇張。
諗落唔知好嬲定好笑，咪睇睡婆婆成日瞌眼瞓，其實街坊買開邊份報紙、找幾多錢，佢全部心裏有數，不知幾精靈，絕對唔似得班官咁話極唔聽，叫極唔醒。官老爺懵到上心口，瞓得仲酣過睡寶寶，南亞匪下次搵食，識點做喇！