港產官僚冇嘢叻，最叻就係A字膊，次次出事例牌藉口多多，推得就推，總之乜都唔關自己事。成日話賭仔姓賴，睇嚟港產官僚都係一擔擔。
呢嗱，話口未完又嚟喇。港珠澳大橋通車一拖再拖，港府一時話人手不足，一時話填海技術有難度，負責本港水域人工島填海工程嘅路政署工程師，最近接受政府新聞網訪問時又有新講法，佢話由於工地鄰近機場，受高度限制等掣肘，自己要同承建商緊密聯繫，商討解決辦法，以符合高度限制喎。
呢啲咪解釋等於掩飾囉。立法會工程界議員就講得啱嘞，機場又唔係今時今日新起，改裝機器符合高度限制亦唔係今日先知，分明係無嘢賴搵嘢賴啫。唔怕唔識貨，最怕貨比貨，大橋內地主體橋樑近日提早合龍，澳門段工程雖然一度受阻，但目前進展順利，唯獨香港段諸多阻滯，正如「東方報業民意調查」顯示，大部分受訪者批評香港基建發展落後，必須急起直追。
大家有眼見，大橋香港段工程可以話係一波三折，好事多磨，從初期遭到司法覆核挑戰，到後來意外頻生，到追加撥款多次受阻，再到人工島工程兩次被揭發出現移位，簡直係鑊鑊新鮮鑊鑊甘。大橋原本計劃今年初通車，後來一延再延，雖然港府信誓旦旦，聲稱一七年通車冇問題，但市民明顯冇乜信心，近八成受訪者無信心大橋可以喺明年完工，甚至擔心再爆甩漏醜聞，令進度雪上加霜。
話時話，本港大型基建延誤超支氾濫成災，淪為沉重公共財政負擔，港珠澳大橋堪稱其中最典型例子。家陣最令人擔心嘅係，大橋本來已經嚴重超支，當局費盡九牛二虎之力，最近先至獲立法會通過追加撥款，好衰唔衰又面對大量承建商申索個案，一旦證實人工島移位係港府責任，將來肯定大把手尾要跟。
當然喇，大型基建蝸行牛步，損失嘅唔單止係金錢，仲有發展機遇。港珠澳大橋由構思至今足足幾十年，即使依家通車，已經錯過咗物流業最繁榮嘅日子，本來大橋食住港珠澳融合條水，仲有一定效益，但如果香港段繼續落後於人，只會削弱本港整體競爭力，進一步影響經濟。仲有吖，港珠澳大橋作為國家級重點基建項目，更被外國機構評為世界「新七大奇迹」之一，萬一畀香港段佗衰家，「重點項目」分分鐘淪為「國際笑話」都似！
正所謂，官僚無能誤蒼生，累人累物累街坊。大部分受訪者批評港府無法把握經濟機遇，直斥香港拖後腿，連累埋粵澳地位，可見群眾眼睛雪亮。