電影《黑鷹十五小時》有一句經典台詞︰「戰場沒有英雄，誰也不想當英雄，只是時勢使然而已。」呢句話套用喺迷你倉大火兩位殉職消防員身上同樣適用。火場沒有英雄，如果唔係迫不得已，又有邊個想壯烈犧牲吖！
呢場延燒超過一百小時嘅長命火終於被救熄，而其中一名殉職嘅高級消防隊長張耀升亦喺尋日路祭，大批身穿制服嘅同袍一字排開，有人手持寫上「我們都愛張Sir，永遠長存」嘅紙牌，有人流下男兒淚；唔少市民自備鮮花致敬，部分人更加專門請假前來悼念呢位英雄，場面莊嚴肅穆，令人動容。
正所謂人死不能復生，要告慰英雄在天之靈，當務之急莫過於徹查意外原因，包括現場指揮係咪失當，以及背後嘅監管、法例漏洞，防止同類悲劇重演。當局聲稱已成立由消防處、警方、屋宇署、地政總署等組成嘅跨部門專案組調查事件，到底會唔會又係一場敷衍民意嘅檢討騷，市民金睛火眼（目及）到實。
真相能否水落石出，仲要拭目以待，但初步喺災場嘅發現，就已經夠晒觸目驚心。一般人心目中，梗係以為放得喺迷你倉，多數都係毛公仔、模型、圖書之類小玩意，再唔係就係漫畫家嘅舊手稿，點知火災現場發現大量危險品，油漆、雪種有之，風煤樽有之，連壓縮氣罐都有之，呢啲都係易燃易爆物，真係睇見都牙煙。講真，今次大火無引爆呢啲危險品，已經算係不幸中之大幸，否則嘅話，分分鐘死得人多。
話時話，迷你倉唔係香港獨有嘅新鮮事，外國一樣大行其道，問題係人哋有嚴格規管。以英國為例，迷你倉必須安裝自動灑水系統、煙霧感應器等防火設備，達到一定面積嘅更要設置防火牆，而用戶亦要向倉主申報儲存物品，邊似得香港咁放任自流，冇針對性規管之餘，仲要喺消防安全漏洞百出嘅舊式工廈裏面經營，唔出事至奇。
當然喇，即使本港無專門法例規管迷你倉，亦唔代表當局可以關人個關。正如有執業大律師話齋，迷你倉擺放嘅物品受《危險品條例》監管，消防處若證實儲存嘅危險品過量，租戶、營運商都要負上刑責，迷你倉租用工廈單位，業主亦有可能要負上刑責。好明顯，如果當局平時有做好自己份工，主動巡查、加強執法，就唔會搞成今日咁喇。
一句講晒，迷你倉百無禁忌，鍾意擺乜就擺乜，同周街堆放計時炸彈冇乜分別，當局再唔深切反省，亡羊補牢，盞「製造」更多救火英雄嘅咋。