有句說話叫「生命不息，奮鬥不止」，如果改為「生命不息，拉布不止」，形容搞事政客就貼切不過嘞。呢班政客平時瘋狂拉布不特止，就算到咗今屆立法會即將壽終正寢，依然死拉爛拉，呢一招擇爛固執，真係唔到你唔服。
嗱，今屆立法會本周五收爐，尋日就係立法會財委會最後一次會議。你知喇，由於立法會拉布流會不斷，搞到議案堆積如山，最後一日仲有成十二項撥款申請要處理，本來係補鑊贖罪嘅唯一機會。點不知財委會有心，反對派無夢，佢哋係都要阻住地球轉，結果喺不斷拉布之下，儘管港府被迫跪低，調動議程，其中七項撥款搶喺最後一刻勉強過關，但最終都有五項撥款申請被拖垮，要留待下屆立法會重新審議。
睇吓被拉倒嘅係乜東東啦，除咗被反對派針對嘅三項社區重點項目工程，仲包括社署開設職位加強監管私營安老院、土木工程拓展署開設四個職位推展大嶼山發展計劃、路政署開設總工程師職位監管高鐵工程等。大家睇到喇，呢啲議案唔止同民生息息相關，仲關乎基建及社會發展，家陣被反對派搞一搞，社會發展及基建進度雪上加霜。好似私營安老院良莠不齊，經常爆出虐老醜聞，難得港府有心加強監管，擺明係好事，偏偏反對派千方百計阻撓，老人家真係多得佢哋唔少咯。
真係諗極唔明，議案明明不涉政治，亦冇乜爭議，反對派咁都要玩嘢，到底有乜居心呢？尤其係佢哋連觀塘音樂噴泉等地區工程都唔放過，聲稱係建制派嘅選舉工程，點都要拉布阻止，簡直係欲加之罪，何患無詞。正如區議員話齋，有關工程得到大部分議員及居民支持，除咗地區居民受惠，全港市民都可以享用，反對派為反而反，簡直累人累物累街坊喇。
反對派口口聲聲反對政績工程，實際上建制派未必有損失，受害嘅係市民街坊，呢啲咪叫「黑狗偷食，白狗當災」囉。呢，好似已經延誤兩年嘅油麻地戲院第二期發展計劃撥款咁吖，之前就畀反對派先拉布後否決，搞到身為八和會館理事會主席嘅汪阿姐忍唔住批評搞事者窒礙粵劇發展。其實，窒礙粵劇發展已經算小兒科嘞，連續兩場工廈大火，揭出消防安全漏洞百出，原定三讀通過嘅《消防（修訂）條例草案》亦因拉布而通過無期，你話拉布政客同草菅人命有乜分別吖？
話時話，今屆立法會唔止已屆尾聲，亦係唔少議員嘅最後一屆。諗唔到部分政客喺最後時刻仲要拉布，呢啲咪叫死不悔改咯，立法會被人叫做垃圾會，真係冇冤枉o架！