如果話港產官僚最擅長乜嘢功夫，相信大家都認同佢哋係太極高手，最叻推莊，你推我讓，根本冇人願意做嘢，冇人願意承擔責任，結果咪搞到民怨沸騰，仲次次都被申訴專員炳到七彩囉。
呢，申訴專員公署發表最新年報，炮轟政府部門協調不足，各自為政，但凡涉及多個部門嘅問題，永遠冇人認頭，十足三個和尚冇水飲嘅故事咁。好似最近發生奪命火災嘅舊式工廈咁吖，僭建問題由屋宇署負責，但屋宇署又認為消防問題消防解決，結果個波始終冇人接手，間接令兩名英勇消防員白白犧牲，恨錯難返。
所以話啫，推得就推，卸得就卸，隨時死人(口架)。可惜吖，港產官僚大有大拖，小有小拖，永遠唔會吸取教訓。再講店舖阻街呢個老問題，涉及房屋署、食環署及屋宇署，但各部門關人個關，一味話自己冇充分權力處理喎。正如申訴專員話齋，部門其實有能力解決問題，但個個都想置身事外，最終要民政事務總署統籌跨部門小組跟進，唔止費時失事，仲令公眾形象大打折扣，呢啲咪叫唔衰攞嚟衰囉。
大家睇到喇，企圖大事化小，小事化了，結果只會令事情愈鬧愈大，適得其反。「東方報業民意調查」嘅受訪者就講得啱嘞，港產官僚各自為政，根本無心做事，加上協調欠佳，卒之令市民受害。最激氣嘅係，一般打工仔咁嘅工作態度，唔使豉椒炒魷都要燉冬菇喇啩，偏偏港產官僚依然好官我自為之，你話係咪吹脹吖？
咁就難怪申訴專員公署年年都收到大堆投訴嘞，淨係上年度就有五千二百幾宗，房屋署及食環署繼續包辦冠亞軍位置，證明屢錯屢犯，死不悔改，簡直唔知醜字點寫。至於教育局、郵政署及消防處亦「一鳴驚人」，首次上榜即入十大。尤其係郵政署，一再「失信於民」唔在講，仲衰到將郵政信箱租戶嘅支票搞錯，有冇再離譜啲吖？
至於消防處咯喎，最多人投訴私人大廈內有涉嫌違反《消防條例》及《建築物條例》嘅改建工程，但消防官僚闊佬懶理，卸得就卸，同處理舊式工廈嘅手法如出一轍。唔少受訪者鬧爆港府管理混亂，無知覺無靈魂，遲早又爆大鑊嘅咋。
真係諗極唔明，港產官僚好似返番去大鑊飯年代咁，做又三十六，唔做又三十六，港府施政更係撞板多過食飯，瑞士洛桑管理學院居然將港府嘅管治效率評為世界第一，都唔知係攞景定係贈興。點都好，知恥近乎勇，唔該港產官僚醒醒定定，展示世界第一嘅風範畀大家睇吓吖。