立法會有名你叫垃圾會，當然係名不虛傳喇，多得搞事政客瘋狂拉布，《醫生註冊（修訂）條例草案》尋日依然未能通過，隨時玩死埋後面嘅消防條例草案，市民希望加強工廈消防安全都唔得，兩名消防英雄真係死得冤枉咯。
呢，前排兩場工廈大火，暴露工廈消防安全有如無掩雞籠，如果《消防（修訂）條例草案》可以趕及今屆立法會尾班車三讀通過，都算係亡羊補牢。點知部分政客為咗小圈子利益，死都唔畀醫委會改革方案通過，搞到議程排喺後面嘅條例草案隨時胎死腹中。保安局局長黎棟國係咁講嘅，當局必須完成審議消防條例草案，先至可以完成埋附屬法例嘅審議，加強規管工廈及迷你倉，佢懇求議員高抬貴手，停止拉布。可惜吖，高官點講都係對牛彈琴咋。
即係咁，消防條例草案擺明十萬火急，偏偏政客阻住地球轉，尋日淨係點算法定人數已經二十次，虛耗大量時間，問你點頂。更荒謬嘅係大狀黨「一黨三立場」，上次醫生註冊條例草案二讀，有人支持，有人反對，有人棄權，神又係佢鬼又係佢，殊不知今次三讀仲離譜，話明會投反對票兼加入拉布喎，即係與民為敵啫。
嗱，人在做，天在看，政客惟恐天下不亂，為拉布而拉布，點止浪費時間、虛耗公帑，直情同草菅人命冇乜分別。中大民調顯示近半港人唔滿意政黨表現，五成四人對政黨嘅整體印象比一年前更差，原因包括唔做實事、只為自己利益、一味互相爭拗、代表唔到民意同埋經常拉布，簡直一語中的，證明公道自在人心。
咁又係呀，呢班政客出名有破壞冇建設，拉布流會當食生菜，邊係為市民服務吖。本報計過，今屆立法會淨係點算法定人數已經超過一千四百次，成功製造十八次流會，損失會議時間超過二百小時，合共浪費近一億元公帑，簡直豈有此理，是可忍孰不可忍吖！
大家有眼見，政客平日就算難得出席會議，都係心不在焉，唔係辦私事就係剪指甲，唔係睇AV就係搵周公，蛇得就蛇，醜態百出。最好笑嘅係，佢哋批評港府高官義正詞嚴，唔知仲以為聖人化身，殊不知其身不正，唔係捲入黑金政治受查，就係包庇護短圍威喂，唔怪得民望低處未算低，比大部分高官更不如。
正所謂，山水有相逢。話咁快又到選舉季節，市民忍咗呢班垃圾政客四年，係時候用手上一票踢佢哋出立法會嘞！