古人教落︰「晚食以當肉，安步以當車。」意思即係話，食唔起肉，等到夜啲肚餓至開飯，一樣咁滋味；冇車坐咯喎，只要行路時行得安穩啲，都可以好似坐車咁舒服。查實「安步當車」一樣適用於今日香港，不過意思完全唔同晒，市民唔係坐唔起車，而係塞車問題嚴重，坐車分分鐘慢過行路，都咪話唔無奈。
話說運輸署就多條路線嘅行車速度進行調查，結果發現舊年有兩個路段車速低得驚人，分別係上環禧利街以及紅磡漆咸道北南行路段，前者平日繁忙時間行車時速只有五點一公里，後者則只有五點七公里，名副其實慢過行路。至於干諾道中、德輔道西等繁忙路段亦唔好得幾多，傍晚收工時分平均車速不足十公里，同踩單車差唔多咋。
係人都知，中、上環係香港嘅金融 中心地帶，日塞夜塞，造成嘅經濟以及社會成本難以計算。如果話道路網絡係城市嘅血管，咁中、上環肯定係心臟，心臟出問題喎，你話幾大鑊吖。之所以搞成咁，「元兇」係載客量較少嘅私家車佔據大部分路面，以上述塞車路段為例，八成都係私家車同的士，咁搞法，唔塞到爆至奇喇！
話時話，中、上環塞車問題講咗N咁多年，港府一直冇乜符弗，淨係獨沽一味寓禁於徵。交諮會去年底就解決道路擠塞問題提出多項建議，當中包括提高違例泊車等定額罰款、增加私家車首次登記稅同牌照費，以及實施電子道路收費等。問題係，調高車輛首次登記稅及牌照費，之前唔係未試過，結果車輛數目不減反增，證明呢招唔work。
話政府淨係識得翹埋雙手等收錢，真係一啲都冇冤枉o架。○三至一三年本港整體車輛數目增加三成，而同期道路總長度微增不足一成，根本不成比例；最離譜嘅係，作為來往中環鬧市替代路線嘅中環灣仔繞道○九年開工至今，一拖再拖，無法趕及一七年通車。一句到尾，交通配套跟唔上，點收費都冇用喇！
他山之石，可以攻玉，要解決道路擠塞問題，唔一定靠收錢嘅。新加坡除咗實施電子道路收費，仲透過嚴格車輛配額制度控制車流；南韓首爾就為巴士開闢專用線路，又提供三十分鐘免費轉乘，鼓勵市民改搭公交，絕對值得參考o架。
計功夫茶話齋，港產官僚胡混度日，旨意佢哋解決塞車問題都係嘥氣，倒不如索性好似環保團體建議咁樣，將德輔道中改建成綠化行人及電車專用區，一來夠晒環保，二來官老爺行路返工，又可以慳番筆養政府車嘅公帑，唔係冇得諗o架！