賊過興兵多敷衍 工廈亂象何時休

話說牛頭角迷你倉及長沙灣工廈接連發生大火，工廈安全再度引發關注，港府例牌搞場跨部門大龍鳳，巡查全港迷你倉，發展局局長陳茂波尋日更親身上陣匯報戰果，佢話注意到有人利用工廈作不合適嘅非工業用途，包括開設補習社、宗教場所、食肆等，引嚟大量人流。你知喇，呢啲工廈消防設施落後，出起事上嚟可大可小。咁都未算，目前全港有近二百幢設有危險品倉庫嘅工廈，當中有幾多涉及違契更改作其他用途，連港府都心裏冇底。

好嘞，工廈安全隱患遍地開花，當局點樣拆彈？地政總署話會向違規工廈業權人發出警告信，要求十四日內糾正，否則會沒收單位；另外又會喺下月底進行首輪行動，巡查全港六幢有儲存危險品嘅違規工廈咁話。

工廈用途五花八門，包羅萬有，十足十計時炸彈，之所以搞成咁，完全係當局長期放任自流種下嘅惡果。大家應該記得，六年前長沙灣青山道工廈大火，就係因為大廈冇安裝灑水系統，導致消防員一死三傷，當時官老爺夠口口聲聲話加強巡查同執法喇，如果唔係講多過做，姿勢大過實際，呢幾年悲劇就唔會一再重演。成日話港府後知後覺，唔死人冧樓唔做嘢，真係冇講錯o架。

家陣冇嘢怕，最怕係亡羊補牢都做到唔湯唔水，到喉唔到肺。呢，屋宇署自○二年開始取締工廈劏房大行動，兩年間淨係發出七十二張清拆令及中止更改用途命令，但真正檢控嘅不足三十宗，最多只係罰款二萬元咁大把，相對全港工廈劏房數目之多、利錢之深，簡直係九牛一毛，呢方面「劏房波」最清楚不過，家陣由佢嚟管工廈安全問題，都可算「深慶得人」咯。

冇計喇，港產官僚就係咁嘅喇，出事前闊佬懶理，出事後急急補鑊，等到事過境遷，好了傷疤忘了疼，一切又回復原貌，工廈安全問題係咁，打擊黑店劏客、清拆僭建物以至全港清潔大行動統統都係咁，今次呢場工廈安全騷會唔會又係爛尾收場，真係冇人話得埋。

一句到尾，賊過興兵多敷衍，工廈亂象何時休。港府部門官僚作風一日唔改，工廈都市炸彈只會長爆長有。話時話，政客有破壞冇建設，可以用選票踢走佢哋，官僚胡混度日，撞板多過食飯，市民都要焗住供養佢哋，都咪話唔悲哀。