早前電視台有個節目《跟住矛盾去旅行》，吸引唔少觀眾。冇錯，香港的而且確係一個充滿矛盾嘅地方，好似話明明係文化沙漠，讀書風氣低落，偏偏每年嘅書展人頭湧湧，丁財兩旺，唔係矛盾係乜？
嗱，一連七日嘅書展尋日又開鑼，氣氛同往年一樣咁熱鬧，唔少人一早拖篋排隊掃書，話係「賓虛」咁嘅場面都冇誇張。今年破紀錄多達六百四十個書商參展，來自世界各地，百花齊放，證明書展已成為國際盛事。貿發局更以「武俠文學」為主題，除咗展出名家真迹，仲邀請作家座談分享，預料入場人次可繼續突破一百萬咁話。
至於書商亦各出奇謀，有人推出諷刺時弊嘅本土政治書籍，以自創怪字作招徠；亦有書商一開始就大減價，希望薄利多銷。市民更加大手筆，唔少人打算豪花一千元買書，想唔話香港人書卷味爆燈都唔得喇。不過咪住先，香港人到底買邊類書多呢？聽吓通宵排隊嘅市民點講啦。排第一位嘅話喎，心儀嘅愛情小說女作家出版嘅簽名新書只得一百本，為咗購得心頭好不惜前晚十二點就嚟霸位；而排第二嘅就話，台灣性感o靚模最後一次出寫真，為咗心中女神，排通宵都抵喎。
即係咁，蘿蔔青菜，各有所愛，愛情小說又好，性感寫真都好，都係個人口味，冇話高定低嘅，但最受港人歡迎嘅書籍離不開娛樂消閒就係不爭嘅事實。睇吓愈來愈多書商搵明星或o靚模出書，搞到書展好似追星會咁，就知道醉翁之意不在酒嘞。再唔係，旅遊消費或投資指南亦好搶手，反而嚴肅文學、世界名著乏人問津，唔怪得書展嘅商業味蓋過書香味喇。
所以話啫，如果以為書展人氣爆燈就等於香港人手不釋卷，只係美麗誤會咋。講真，香港人有幾鍾意睇書，搭一程港鐵咪一清二楚囉，幾乎所有乘客都係「低頭族」，但睇嘅唔係書而係手機之嘛。有人話書展之所以咁墟冚，無非出於香港人愛湊熱鬧嘅心理，雖不中亦不遠。嗱，有機構調查過去半年香港人平均睇書二點八本，係就係比之前同類調查嘅一點七本有所增加，但比起法國人年均十本、日本人八點四本、南韓人十點八本仍遠遠不及，香港到底有幾多愛書之人，心照喇。
冇計嘞，淨係睇吓教育局局長吳克儉咪知囉，佢老哥自稱月睇三十本書，照計應該學富五車，滿肚墨水，點知次次都開口夾着脷。連堂堂搞教育嘅高官都係咁嘅料，去旅行睇學生妹多過睇書，香港人寄情娛樂，鍾意睇寫真多過文字又有乜出奇！