對市民屈得就屈 對人蛇庇得就庇

聽吓盧處長點講。佢強調警隊專業廉潔，有承擔兼訓練有素，今次之所以拉錯人只係破案心切，唔係砌生豬肉；又話警方會改善同精神上無行為能力人士嘅會面安排，包括向佢哋發出「守護卡」以資識別，以及向家屬同社工等發出「合適成年人通知書」。

即係咁，做大嘅出面撐班細嘅係人之常情，但撐還撐，都唔好侮辱市民智慧吖嘛。好簡單，如果警方真係好似一哥講到咁英明神武，就唔會明知疑犯有不在場證據，都照扣留四十八小時，更加唔會明知對方冇自辯能力，都照問引導性問題進行誘供。所以話，警方今次唔止「破案心切」，直頭係「殺良冒功」。呢，古時候將領可憑敵人首級領賞，啲無恥小人咪就係濫殺無辜，利用老百姓人頭充數嘅囉。

話警方「殺良冒功」，絕對唔係砌生豬肉。要知道，「殺良冒功」關鍵在一個「良」字，要搵人頭領賞咯喎，梗係搵手無寸鐵嘅老弱婦孺開刀；同樣道理，警方向智障人士埋手，想佢認咩罪就認咩罪，方便夾就手，唔通向五大三粗嘅南亞兵團動土咩。講真，受害人有家屬幫手尋求公道算好彩嘅喇，如果唔係，分分鐘依家仲坐緊冤獄吖。

可能因為南亞兵團特別兇狠，唔會任人魚肉喇，警方對住佢哋硬係好似老鼠拉龜咁束手無策，好似老報販「睡婆婆」慘遭冷血南亞匪徒毆劫咁吖，又唔見警方「破案心切」，求其拉個嫌犯兼火速開記者會邀功。仲有呀，南亞兵團姦淫擄掠，無惡不作，元朗、深水埗等成為重災區，有居民甚至計劃組織更練團自保；本地黑幫操控假人蛇來港犯案，幕後黑手至今逍遙法外，難怪「警黑一家親」指控甚囂塵上。對無辜市民屈得就屈，對犯罪分子庇得就庇，天理何在！

當然喇，講到欺善怕惡，唔單止警方，成個港府都係一擔擔。假難民禍港多年，搞到天怒人怨，港府慷納稅人之慨包食包住唔在講，對於民意要求香港退出聯合國《禁止酷刑公約》以及重設禁閉營，居然好似借咗聾耳陳隻耳咁，置若罔聞，咁樣同包庇罪犯有乜分別吖。

計功夫茶話齋，佩戴「守護卡」的確好有必要，不過就唔係智障人士，而係警方高層以及一眾港府高官。唔係咩，警方破案無能胡亂拉人頂數，港府應對假難民禍港後知後覺，無所作為，話唔係飲鉛水飲到懵咗都冇人信喇！