現屆政府冇嘢叻，最叻就係玩弄語言偽術，而且唔知係咪會傳染，連公立醫院都玩埋一份，唔怪得醫療事故不絕如縷，病人出咗事都唔知點解喇。
講緊嘅之唔係廣華醫院囉。話說今年五月該院發生初生女嬰從溫箱墮地受傷事故，院方指涉事B女天生神力，輕易踢開成年人都難以打開嘅溫箱，咁驚人嘅解釋，莫講話B女父母唔信，全港市民亦唔會相信。隨着事情鬧大，廣華醫院不得不認衰，成立跨部門專家小組調查，尋日發表調查報告，不過咪以為真相大白喎，只係令人愈聽愈糊塗咋。
聽吓專家小組主席點講吖。佢話溫箱牢固，排除「B女自行踢開」嘅可能。至於溫箱窗口點解會打開，佢解釋有兩種可能性，一係護士未關上，一係關上後唔小心觸動打開，院方就認為未關上嘅機會好微，反而意外碰到開窗掣嘅機會較大，最大機會係護士蓋上遮光布時，意外打開溫箱窗口而不察覺喎。加上院方曾將溫箱嘅床墊及床架調高，幫助B女呼吸，形成頭高腳低，B女頭部位置與窗口成水平，有機會穿過窗口發生今次意外，結論係無心之失，唔屬於犯錯咁話。
吓，無心之失？唔屬於犯錯？唔係啩。大家有眼見，成份報告乜都靠估，全部都係「可能」，根本冇查出真相，連在場記者都忍唔住質疑，成份報告估估吓，點排除有護士忘記關上溫箱窗口呢個可能呢？B女父母更加狠批報告兒戲，話從未見過溫箱蓋上遮光布，唔相信B女可以九十度轉身跌落地，表明唔能夠接受。嗱，專家小組好醒嘅，梗係將個波拋畀警方啦，話小組無可能將事件重演，嚴重嘅指控就留番警方調查喎。
即係咁，專家小組由醫院成立，自己人查自己人，說服力有幾高大家預咗喇。之不過預咗還預咗，唔等於大家要繼續忍受呢種習非成是嘅態度。人命關天，醫護人員必須對病人負責，點容許卸得就卸、賴得就賴呀？再講吖，當初院方聲大夾惡話B女自行踢開溫箱，今次報告全盤推翻呢個講法，即係當初有人講大話，誠信有問題，咁都唔使受罰，仲成世界嘅？
冇計嘞，香港「醫醫相衞」根深柢固，病人隨時死咗都唔知咩事。呢，上次九龍醫院癌翁紗布封喉致死案，三名被裁定專業失德嘅護士不過被罰停牌一個月咁大把，受害者死得係咪好冤枉？本來呢，改革醫委會方案如果喺上屆立法會通過，有望改善醫醫相衞嘅情況，可惜吖，部分醫界抗拒改革，加上政客自私自利，條例草案喺最後一刻被拉倒，病人只好自求多福咯。